ٺٽو: جھرڪ ۾ پيئڻ جي پاڻي لاءِ پنجن ٽينڪن واري اسڪيم مڪمل، علائقي واسي ۾ خوشي جي لهر

پ پ ليڊيز ونگ جي تعلقي صدر ۽ ضلعي ڪائونسلر امينا احسان ڀٽي جي ڪوششن سان واٽر ٽينڪ اسڪيم مڪمل

ٺٽو ( محمد شفيق ڀٽي)جھرڪ ۽ ڀرپاسي وارن علائقن ۾ پيئڻ جي پاڻي جي کوٽ کي نظر ۾ رکندي پاڪستان پيپلز پارٽي ليڊيز ونگ تعلقي ٺٽي جي صدر ۽ ضلعي ڪائونسلر امينا احسان ڀٽي جي ڪوششن سان ضلعي ڪائونسل جي بجيٽ مان پنج واٽر ٽينڪ ٺاھڻ جي اسڪيم منظور ڪئي وئي، جيڪي هاڻي مڪمل ٿي چڪيون آهن۔ھي واٽر ٽينڪ (1) ڏاڏوري، (2) شيخ اسماعيل، (3) علي چانگ ۽ ٻه ٽينڪ جھرڪ شهر ۾ تعمير ڪيا ويا آهن، جتي اڳ ۾ پيئڻ جي پاڻي جي سخت کوٽ آھي۔علائقي واسين جو چوڻ آهي ته ”اسان کي اڳ ۾ پاڻي ڀرڻ لاءِ ميلن تائين پري وڃڻو پوندو هو، هاڻي گھر جي ويجهو ٽينڪ مان صاف پاڻي آساني سان ملندو ، جيڪا ھڪ وڏي سھولت آھي، جنهن سان وقت ۽ خرچ ٻنهي جو بچاءُ ٿيندو“ضلعي ڪائونسلر امينا احسان ڀٽي جو ان حوالي ساڻ چوڻ آھي تہ ”مون، جتي به پاڻي جي کوٽ هئي اتي واٽر ٽينڪ ٺهرائي ڏنا آهن ته جيئن علائقي جا ماڻهو آساني سان پيئڻ جو پاڻي حاصل ڪري سگهن ۽ پريشانين کان بچي سگهن۔ جھرڪ ۽ آس پاس جي ترقي منهنجي ترجيح آهي ۽ ايندڙ ڏينهن ۾ ھن علائقي لاء وڌيڪ اسڪيمون به منظور ڪرائي ڏينديس۔“مقامي ماڻهن امينا احسان ڀٽي جي ڪوششن کي ساراهيندي چيو ته ”جيڪا سهولت اسان کي ڪيترن سالن کان نه ملي سگهي، اها امينا احسان ڀٽي جي جدوجهد سان هاڻي ملي آهي۔ اسان سندس نھايت ئي ٿورائتا آھيون.