لکي غلام شاهه ۾ هاري جدوجهد ڪميٽي پاران سارين جي اگهه ۾ گهٽتائي خلاف ريلي

ڳوٺ قادر بخش کوسو کان ڄامڙا اسٽاپ تائين ريلي ڪڍي وڏي، هاري، مزدور ۽ سماجي اڳواڻ به شريڪ

شڪارپور (احسان ابڙو) شڪارپور لڳ لکي غلام شاهہ ڄامڙا ۾ هاري جدوجهد ڪميٽي ضلع شڪارپور پاران سارين جي گهٽ اگهن خلاف وڏي احتجاجي ريلي ڪڍي وئي، جنهن ۾ سوين هارين، مزدورن ۽ سماجي اڳواڻن وڏي انگ ۾ شرڪت ڪئي ريلي ڳوٺ قادر بخش کوسو کان شروع ٿي ڄامڙا اسٽاپ تائين پهتي، جتي شرڪت ڪندڙن هٿن ۾ بينر ۽ ڳاڙها جهنڊا کڻي “هارين کي انصاف ڏيو”، “سارين جو منصفاڻو اگهه مقرر ڪيو”، ۽ “هارين جو معاشي قتل بند ڪيو” جا زوردار نعرا هنيا ريلي جي اڳواڻي مير صابر حسين کوسو، علي کوسو، ڊاڪٽر رمضان جوڳي، علي نواز جت، ناز نصرالله مھر، غمٺار دل، الله داد جاگيراڻي، نظام الدين جوڳي، فھيم جمالي، ارشاد جمالي ۽ بہادر علي جت ڪئي.اڳواڻن ميڊيا سان ڳالهائيندي چيو ته هن وقت مارڪيٽن ۾ سارين جا اگهه انتهائي گهٽ آهن، جنهن سبب هارين جو معاشي قتل عام ٿي رهيو آهي. غريب هاري پنهنجي خاندان جو گذر صفر مشڪل سان ڪري رهيا آهن، جڏهن⁠ تہ سرمائيدار ۽ واپاري سندن محنت جو ميوو کڻي رهيا آهن اڳواڻن چيو ته ريٽ گهٽ رھجڻ سان غريب هاري سخت پريشانيءَ ۾ آهن، جڏهن⁠ تہ وڏا واپاري ۽ بروڪر سندن محنت مان فائدو ماڻي رهيا آهن، جيڪو سماج ۾ معاشي نابرابري وڌائي رهيو آهي. حڪومت جي بي حسي ۽ مارڪيٽ ۾ بي ضابطي سبب زرعي شعبي کي شديد بحران کي منهن ڏيڻو پيو آهي اڳواڻن وڌيڪ چيو ته جيڪڏهن سارين جا اگهه وڌايا وڃن ته نه رڳو هارين جي زندگيءَ ۾ سڌارو ايندو، پر ڳوٺاڻن علائقن جي معيشت ۾ به استحڪام پيدا ٿيندو. هنن چيو ته زرعي ملڪ هجڻ باوجود هاري بک ۽ بيروزگاريءَ سان منھن ڏئي رهيو آهي، جيڪو وڏي ناانصافي آهي.احتجاج ڪندڙن مطالبو ڪيو ته ايري ڇهون نمبر سارين جو اگهه گهٽ ۾ گهٽ چار هزار رپيا في مڻ ۽ سپر سارين جو اگهه اٺ هزار رپيا في مڻ مقرر ڪيو وڃي، جڏهن⁠ ته مارڪيٽ ۾ ريٽ تي ڪنٽرول ۽ خريداري مرڪزن جي قيام لاءِ حڪومتي قدم کنيا وڃن احتجاج ڪندڙن خبردار ڪيو ته جيڪڏهن حڪومت فوري طور نوٽيس نه ورتو ته احتجاج جو دائرو ضلعي سطح کان صوبائي ۽ قومي سطح تائين وڌايو ويندو. اڳواڻن حڪومت کان مطالبو ڪيو ته زرعي پاليسيون هارين جي راءِ سان تيار ڪيون وڃن ۽ کين سندن محنت جو منصفاڻو معاوضو ڏنو وڃي، ٻي صورت ۾ احتجاجي تحريڪ وڌيڪ تيز ڪئي ويندي.