ترقي جي نالي تي سنڌ جي لکين ايڪڙ زمينن تي قبضي جو منصوبو آھي: اياز لطيف پليجو

سنڌ جا ماڻھو سنڌو درياھ، زمينن، وسلين ۽ پنھنجي حقن لاء ۽ خراب حڪمراني خلاف جدوجھد تيز ڪن

حيدرآباد(بيورو) قومي عوامي تحريڪ جي سربراھ اياز لطيف پليجي چيو تہ گرين پاڪستان جي نالي ۾ سنڌ جي لکين ايڪڙ زمينن تي قبضي جو منصوبو آھي. سنڌ جي لکين ايڪڙ زمين مختلف ڪمپنين ۽ ادارن کي ڏئي سنڌي ماڻهن کي پنهنجي ڌرتي تان بي دخل ڪرڻ جو سنڌ دشمن منصوبو آهي. اياز لطيف پليجي چيو تہ سنڌ جا ماڻھو پيپلزپارٽي ۽ سنڌ حڪومت مان اميد ڪرڻ بدران سنڌو درياھ، زمينن، وسلين ۽ پنھنجي حقن لاء ۽ خراب حڪمراني خلاف جدوجھد تيز ڪن.اصل طاقت پورھيت، ھاري ۽ محنت ڪش عوام آھي. سنڌ جا ماڻھو مصلحتن خاموش ويھڻ ۽ ٻين جي اٿڻ جو انتظار ڪرڻ بدران پنھنجي حصي جو ڪردار ادا ڪن. ناانصافيون بدراشت نہ ڪيو. حق ۽ سچ جو آواز بلند ڪيو. حڪمران ڪمزور آھن. عوام جي خاموشي ڪرپٽ حڪمرانن کي طاقتور بنائي ٿي.اياز لطيف پليجي چيو تہ غريب، پورھيت، ھاري پنھنجي بنيادي حقن لاء ٻڌي ڪن قومي، انساني ۽ بنيادي حقن جي جدوجھد لاءِ اڳتي اچن. 18 سال ۾ ھڪ نئون نسل جوان ٿي وڃي ٿو. پ پ حڪومت سنڌ کي پوئتي ڌڪي ڇڏيو آھي. زراعت تباھ کي ھٿ وٺي تباھ ڪيو ويو آهي پاڻي تي ڌاڙا لڳي رھيا آھن. قومي وسيلا ۽ لکين ايڪڙ زمين تين وال ڪيو پيو وڃي. ڪا بہ نئين صنعت ۽ نئين يونيورسٽي قائم نہ ٿي آھي. حڪمرانن مان ڪو بيمار ٿئي ٿو تہ اھو سنڌ جي اسپتالن مان علاج ڪرائڻ بدران دبئي، آمريڪا يا ٻين ملڪن ڏانھن علاج لاءِ ڀڄي وڃي ٿو. سنڌ جي سرڪاري اسپتالن ۾ ملندڙ دوائون نقلي آھن. ٽيسٽن جون سھولتون ناھن. اڪثر اسڪولن ۽ ڪاليجن جي حالت بہ بدتر آھي. اياز لطيف پليجي چيو تہ سنڌ ۾ حڪومت بدران مافياز جو راڄ آھي. منشيات، ڦورو، ڌاڙيل، لينڊ گريبر، نقلي دوائون، نقلي ڀاڻ، نقلي ٻج، کاڌي پيتي جي شين ۾ ڪيميڪل جي ملاوٽ ڪندڙ ۽ ٻي مافيا ايتري طاقتور آھي جو انھن خلاف ڪير بہ ڪارروائي ڪرڻ لاء تيار ناھي. نوڪريون ۽ ڊگريون وڪرو ڪندڙن کي وزيرن جي سرپرستي حاصل آھي. سرڪاري آفيسن ۾ ڪرپٽ مافياز آھي. جيڪو جيترو طاقتور آھي اھو پنھنجي مرضي جا قانون ٺاھي ويٺل آھي.