عمرڪوٽ ۾ مهانگائي جو طوفان، اٽي جي في مڻ قيمت ۾ هڪ هزار کان 1200 رپيا واڌ

کاڌي پيتيءَ ۽ روزمره جي استعمال جون شيون چوٽ چڙھي ويون،ضلعي انتظاميه اگھور ننڊ سُتل

عمرڪوٽ (رپورٽ:ڪانجي مل رکيسر) عمرڪوٽ ۾ مهانگائي ماڻهن جو جيئڻ جنجال ڪري ڇڏيو آهي، منافع خور مافيا اٽي سميت ٻين کاڌي پيتي جي شين ۽ روزمرهه جي ضرورتن جي شين جي قيمتن ۾ من ماني واڌ ڪري ڇڏي آهي، اٽي جي چڪين ۾ اٽي جي في مڻ قيمت ۾ هڪ هزار کان 1200 رپيا تائين اضافو ٿيو آهي، جنهن بعد عام ماڻهون لاءِ ماني کائڻ مشڪل بڻجي وئي آهي، شهرين جو چوڻ آهي ته صرف اٽو نه پر چانور، دالون، تيل، گيهه، کير، ڀاڄيون ۽ ميوا به گهڻائي مهانگا ٿي ويا آهن، دڪاندار ۽ واپاري سرڪاري اگهن کي نظرانداز ڪري پنهنجا اگهه وصول ڪري رهيا آهن، جڏهن ته مارڪيٽ ڪميٽي ۽ ضلعي انتظاميه رڳو ڪاغذي ڪاروائين ۽ فوٽو سيشن تائين محدود آهن، شهرين شڪايت ڪئي آهي ته روزانه مزدوري ڪندڙ پورهيتن ۽ غريب طبقي لاءِ ٻه وقت جي ماني جو بندوبست ڪرڻ ڏاڍو ڏکيو ٿي ويو آهي، هنن خبردار ڪيو آهي ته جيڪڏهن حڪومت ۽ انتظاميه طرفان فوري طور اثرائتا قدم نه کنيا ويا ته هو احتجاجي تحريڪ هلائڻ تي مجبور ٿي ويندا، شھرين مطالبو ڪيو آهي ته اٽي سميت کاڌيءَ پيتيءَ جون شيون روزمره جي استعمال جون سڀ شيون فوري طور سستي ڪيون وڃن، سرڪاري اگهن تي سختي سان عمل ڪرايو وڃي ۽ ذخيره اندوزن خلاف ڪاروائي ڪئي وڃي.