ڪالاباغ ڊيم بابت علي امين گنڊاپور جو بيان سنڌي، بلوچ ۽ پشتون عوام سان دشمني آھي. ڊيم ھرگز ٺھڻ نہ ڏينداسين: اياز لطيف پليجو

امڪاني ٻوڏ واري صورتحال سبب سڄي سنڌ جا بند ڪيل ڪئنال، ڦليلي، پنڃاري سميت واھن ۽ شاخن کي جلد کوليو وڃي: اياز لطيف پليجو

حيدرآباد(بيورو) قومي عوامي تحريڪ جي سربراھ اياز لطيف پليجي چيو آهي تہ ٻوڏ ۽ برسات جو جواز ڄاڻائي سڄي سنڌ جا بند ڪيل ڪئنال، ڦليلي، پنڃاري سميت واھن ۽ شاخن کي جلد کوليون وڃن. درياھ ۾ وڏي چاڙھ باوجود سنڌ جي اڪثر ضلعن ۾ پاڻي کوٽ آھي. فصل سڪي رھيا آھن. آبدگار ۽ ھاري پريشان آھن. پاڻي کوٽ جي متاثر آبادگارن کي معاوضو ڏنو وڃي. اياز لطيف پليجي چيو تہ ڪالاباغ ڊيم بابت علي امين گنڊاپور جو بيان سنڌي، بلوچ ۽ پشتون عوام سان دشمني آھي. ڊيم ھرگز ٺھڻ نہ ڏينداسين.ڪالا باغ ڊيم ۽ ڪئنال منصوبا ممڪن ناھن. سنڌي قوم درياھ دشمن منصوبن کي جتي جي نوڪ تي رکي ٿي. پاڻي زندگي آھي. سنڌو درياھ کي قتل ۽ بنجر بنائڻ واري سازش کي سنڌ جو ست ڪروڙ عوام ڪنهن بہ صورت برداشت نہ ڪندو. پاڻي لاء جدوجھد سنڌ جي وحدت ۽ وجود جي جدوجهد آهي. اياز لطيف پليجي چيو تہ حڪمران طبقي ۽ ڪامورن لاءِ بيشمار مراعتون آھن. بجلي، گئس، صحت جي سھولتن سميت ھوائي سفر ۽ ٻيون سھولتون مفت آھن پر ملڪ جي ھاري، پورھيت، مزدور، محنت ڪش ماڻھو لاءِ 2 وقت جي ماني حاصل ڪرڻ بہ مشڪل آھي. تعليم، صحت سميت بنيادي حقن جو سھولتون ناھن. عوام جي خوشحالي بدران بدحالي حڪمرانن جي ايجنڊا بنجي ويو آھي. اياز لطيف پليجي چيو تہ اقتدار خاطر پيپلزپارٽي ۽ آصف علي زرداري پنجاب سان گڏجي سنڌ جي پاڻي تي ڌاڙو هڻائي، ڊيم ۽ ڪئنال ٺاھي سنڌ کي تباھ ڪرڻ چاھين ٿا. اياز لطيف پليج چيو تہ پيپلزپارٽي ھٿ وٺي سنڌ جي عوام کي تباھ ۽ برباد ڪرڻ چاهي ٿي. ھارين، مزدورن طبقي کي سمجھڻو پوندو تہ موجوده سنڌ حڪومت وٽ انھن جي ترقي ۽ خوشحالي بدران تباھي جو منصوبو آھي. اياز لطيف پليجي چيو تہ نوجوان سنڌ جو مستقبل آھن، اھي ميرٽ ذريعي مقابلو ڪن. دنيا جي ملڪن ۾ اسڪالرشپ حاصل ڪن. روزگار ڪن. سنڌ جي حڪمرانن وٽ نوجوانن کي ڏيڻ لاءِ دوکا آھن. رڳو ڪوڙا دلاسا. لسٽون ٺاھڻ جا دوکا ڏئي نوجوانن کي بنگلن جا چڪر ھڻايا وڃن ٿا. پبلڪ سروس ڪميشن ڪرپشن جو اڏو بڻجي وئي آھي.