ملير: بن قاسم پوليس جي ڪارروائي، مدي خارج ۽ صحت لاءِ هاڃيڪار دوائون وڪڻندڙ ٽولو گرفتار

ڳجهي اطلاع تي ڪارروائي ڪري صحت لاءِ هاڃيڪار ۽ مدي خارج دوائون وڪڻندڙ ٽولي کي گرفتار ڪري ورتو: پوليس

ملير (رپورٽ: عبدالرشيد مورجھريو) بن قاسم پوليس ڳجهي اطلاع تي ڪارروائي ڪندي خطرناڪ مدي خارج ۽ صحت لاءِ هاڃيڪار دوائون وڪڻندڙ ٽولي کي گرفتار ڪرڻ جي دعوا ڪئي آهي پوليس مطابق گرفتار ٿيل ٽولو مدي خارج دوائون ٻيهر پيڪ ڪري مارڪيٽ ۾ وڪرو ڪندو هو جنهن سبب شهرين جون حياتيون خطري ۾ پئجي ويون هيون.پوليس موجب گرفتار ٿيل جوابدارن ۾ شڪيل، امير، سيف الرحمان، مير عالم، نظام بوستان، حسين ۽ شوڪت شامل آهن. پوليس جو چوڻ آهي ته هن ٽولي جا ڪارندار مختلف فارماسيؤٽيڪل ڪمپنين مان ايڪسپاير ٿيل دوائون ۽ خام مال چوري ڪري وري ان کي ٻيهر وڪرو ڪندا هئا جاچ دوران انڪشاف ٿيو آهي ته هن نيٽورڪ جو اڳواڻ شڪيل آهي، جيڪو هڪ ڪمپني ۾ سپروائيزر طور ڪم ڪندو هو ۽ پنهنجي ساٿين سان گڏ زهر جهڙيون ۽ صحت لاءِ هاڃيڪار دوائون چوري ڪري مارڪيٽ ۾ سپلاءِ ڪندو هو بن قاسم پوليس جو چوڻ آهي ته گرفتار ٿيل جوابدارن خلاف ضابطا کارروائي ڪئي پئي وڃي ۽ وڌيڪ جاچ جاري آهي ته جيئن انهن جي ٻين ساٿين ۽ خريدارن تائين به پهچجي سگهي.