عمرڪوٽ ۾ ايس ٽي ايل ايف پاران معذورن لاءِ ڪاروباري ترقيءَ بابت تربيت

ورڪشاپ جو مقصد معذور نوجوانن، مردن ۽ عورتن کي ڪاروباري صلاحيتن ۾ اڳڀرو ڪرڻ، سندن اعتماد وڌائڻ هو

عمرڪوٽ (رپورٽ:ڪانجي مل رکيسر)خدمت ۽ سماجي ذميواري جي جذبي سان ڪم ڪندڙ غير سرڪاري اداري سيِو دي لائيوز فائونڊيشن (STLF) پاران ڊپارٽمينٽ ايمپاورمينٽ آف پرسنس وٿ ڊس ايبليٽيز گورنمينٽ آف سنڌ جي سھڪار سان 50 معذور ماڻھن لاءِ هڪ ڏينهن جو ڪيپيسٽي بلڊنگ ورڪشاپ آن بزنس ڊولپمينٽ منظم ڪيو ويو.ورڪشاپ جو مقصد معذور نوجوانن، مردن ۽ عورتن کي ڪاروباري صلاحيتن ۾ اڳڀرو ڪرڻ، سندن اعتماد وڌائڻ ۽ کين روزگار لاءِ نون موقعن سان روشناس ڪرائڻ هو شرڪت ڪندڙن کي ڪاروباري منصوبابندي، مارڪيٽنگ حڪمت عملي، مالي وسيلن تائين رسائي، پنهنجو ڪاروبار شروع ڪرڻ جا طريقا ۽ جدت ذريعي مارڪيٽ ۾ مقابلي لاءِ ضروري مهارتن بابت جامع ڄاڻ ڏني وئي. ان دوران عملي مشقون ۽ گروپ سرگرميون پڻ ڪرايون ويون ته جيئن شرڪت ڪندڙ حقيقي ڪاروباري چيلنجز کي بهتر نموني منهن ڏئي سگهن ورڪشاپ ۾ ٽرينر امير حمزا جديد ڪاروباري طريقن ۽ ڪامياب مثالن ذريعي شرڪت ڪندڙن کي متاثر ڪيو. هن چيو ته “معذور فرد جيڪڏهن صحيح موقعا ۽ سهڪار حاصل ڪن ته هو ٻين ماڻهن جيترا ئي ڪامياب ٿي سگهن ٿا.”ان موقعي تي ايس ٽي ايل ايف جي سي اي او ڪنھيا موھن لال خطاب ڪندي چيو ته اسان جو عزم آهي ته معذور نوجوانن کي معاشري ۾ باعزت مقام ڏيون ۽ کين اهڙيون مهارتون سيکارينداسين جيڪي کين مالي ۽ سماجي طور خودمختيار بڻائين. اسان لاءِ سڀ فرد برابر آهن ۽ اسان جو مقصد هڪ اهڙو سماج قائم ڪرڻ آهي، جتي ڪنهن به فرد کي سندس جسماني گهٽتائي جي بنياد تي پوئتي نه ڇڏيو وڃي”ورڪشاپ جي پڄاڻيءَ تي شرڪت ڪندڙن وڏي خوشي ۽ شڪريي جو اظهار ڪيو ۽ ايس ٽي ايل ايف جي ڪوششن کي ساراهيندي چيو ته اهڙا پروگرام سندن لاءِ زندگيءَ ۾ نوان در کوليندا.