زرعي ايمرجنسي پلان تيار پيو ڪجي، ايندڙ هفتي اعلان ڪيو ويندو، وڏو وزير سيد مراد علي شاهه پاران سکر ۽ گڊو بئراجن جا دورا

وڏي وزير جو سيلاب متاثر علائقن، رليف ڪيمپن ۽ بيرا جن جو دورو

سکر/گڊو (رپورٽرز وٽان): سنڌ جي وڏي وزير سيد مراد علي شاهه آچر ڏينهن سيلاب متاثر علائقن، رليف ڪيمپن ۽ بيرا جن جو تفصيلي دورو ڪيو ۽ عوام کي يقين ڏياريو ته سندن حفاظت صوبائي حڪومت جي پهرين ترجيح آهي۔ ان موقعي تي هن سنڌ جو ايندڙ زرعي ايمرجنسي پلان به ظاهر ڪيو، جنهن جو مقصد ڪڻڪ جي پيداوار وڌائڻ ۽ خوراڪ جي سلامتي کي يقيني بڻائڻ آهي۔ مراد علي شاهه چيو ته سنڌ ۾ ڪڻڪ جي پيداوار گذريل سال 42 لک ٽن مان گهٽجي هن سال 31 لک ٽن رهجي وئي آهي، پر مارچ 2026 تائين لاءِ ذخيرو موجود آهي۔ هن ٻڌايو ته هارين لاءِ هي منصوبو ايندڙ هفتي جاري ڪيو ويندو، جيئن پوک کي بهتر بڻائي سگهجي۔ سکر بيرا ج جي دوري دوران وڏي وزير ميڊيا کي سيلابي صورتحال ۽ حڪومت جي قدمن بابت بريفنگ ڏني۔ هن ٻڌايو ته سکر بيرا ج تي پاڻي جو اچڻ 6 لک 50 هزار کان 7 لک ڪيوسڪ جي وچ ۾ آهي، جيڪو قومي آفتن جي انتظامي اداري طرفان ڏنل شروعاتي اڳڪٿي 11 کان 12 لک ڪيوسڪ کان گهٽ آهي۔ پر حڪومت وڏي مقدار جي امڪان تحت ئي تياريون ڪيون هيون۔ حفاظتي بند اٺ فٽ تائين مٿي ڪيا ويا آهن ۽ حساس هنڌن تي عملي کي مقرر ڪيو ويو آهي۔ وڏي وزير حڪومت جون ٽي ترجيحات بيان ڪيون: انساني جان بچائڻ، اهم ڍانچي جي حفاظت ۽ بندن کي مضبوط ڪرڻ۔ هن چيو ته جاني نقصان تمام گهٽ آهي ۽ سڌي طرح سيلاب سان لاڳاپيل ناهي، وڌيڪ جاني نقصان کان بچڻ لاءِ قدم کنيا ويا آهن۔ هن وفاقي حڪومت تي زور ڏنو ته سيلاب متاثرن لاءِ امداد سڌي طرح بينظير انڪم سپورٽ پروگرام وسيلي ڏني وڃي۔ هن چيو ته پاڪستان کي گڏيل قومن ۽ عالمي برادري کان به مدد وٺڻ گهرجي، ڇو⁠تہ هن تباهي جي اصل سبب موسمياتي تبديلي آهي۔ صوبائي حڪومت موجب سنڌ ۾ رليف سامان، ميڊيڪل ڪيمپ ۽ مويشن جي ويڪسينيشن مهم اڳ ئي جاري آهي۔ جولاءِ کان هينئر تائين هڪ لک ست هزار کان وڌيڪ جانورن کي حفاظتي ٽڪا لڳايا ويا آهن، جڏهن⁠تہ ڪچي جي علائقي ۾ هڪ لک 56 هزار چوپایو مال جي سار سنڀال جاري آهي۔ علي واهڻ ڳوٺ ۾ پاڪ نيوي ۽ ريسڪيو 1122 جي ٽيم هڪ هزار کان وڌيڪ متاثر ماڻهن کي محفوظ هنڌ منتقل ڪيو آهي۔ سکر بيرا ج تي چيني انجنيئرن وڏي وزير کي 16 نون دوازن جي لڳائڻ بابت بريفنگ ڏني، جيڪي سنڌ بيراجز امپروومينٽ پروجيڪٽ تحت لڳايا پيا وڃن۔ وڏي وزير 24 ڪلاڪ نگراني جي هدايت ڪئي ۽ چيو ته سکر بيراج انجنيئرنگ جو شاهڪار آهي، پر ان جا ڪي دروازا مرمت طلب آهن۔ سکر ۽ گڊو بيرا جن تي پاڻي جي چاڙهه سومر تائين برقرار رهڻ جي اميد آهي، جڏهن⁠ تہ 21 سيپٽمبر تائين ڪوٽڙي بيرا ج تي 4 لک ڪيوسڪ پاڻي اچڻ جي اڳڪٿي آهي۔ گڊو بيرا ج تي هن وقت 6 لک 27 هزار 908 ڪيوسڪ پاڻي وهي رهيو آهي، جيڪو ان جي 11 لک ڪيوسڪ گنجائش کان گهٽ آهي۔ حساس هنڌن جهڙوڪ ٽوري بند ۽ ڪي ڪي بند کي مضبوط ڪيو پيو وڃي ۽ لڳاتار نگراني جاري آهي۔ ڪشمور ۾ وڏي وزير ٻڌايو ته ٽن ملين ماڻهن کي محفوظ هنڌ منتقل ڪيو ويو آهي ۽ امدادي ادارا مؤثر نموني ڪم ڪري رهيا آهن۔ هن ٻيهر متاثرن لاءِ سڌي ريت امداد جي فوري فراهمي تي زور ڏنو۔ دوري جي پڄاڻي تي مراد علي شاهه سنڌ جي عوام جي حوصلي کي ساراهيو ۽ چيو ته صوبو هي قدرتي آفت به ساڳيءَ ريت ڪٽيندو جيئن ماضي جي بحرانن کي گڏجي منهن ڏنو ويو۔