پ پ مينارٽي ونگ سنڌ جي نائب صدر مکي اوڌامل پاران ملير جي مختلف علائقن جو دورو

مکي اوڌامل ڇوٽا گيٽ وٽ ڪڇي ڪولھي ڳوٺ جو دورو ڪري ڪولھي برادري جي ماڻهن سان ملاقات ڪري مسئلا ٻڌا

ملير (رپورٽ: عبدالرشيد مورجھريو) پاڪستان پيپلزپارٽي مينارٽي ونگ سنڌ جي نائب صدر مکي اوڌامل، ملير مينارٽي اتحاد جي اڳواڻ سنتوش ڪمار ڀيل، رميش ڪمار اوڏ، مڪيش ڪمار مهيشوري، درشن لال، همير داس، گيان چند، رامچند، موهن لال، هوتو ڪڇي ۽ پپو مڪواڻي سان گڏجي گڏپ اپ ٽائون جي مختلف علائقن جو دورو ڪيو۔ وفد ڇوٽا گيٽ لڳ ڪڇي ڪولھي ڳوٺ جو دورو ڪيو، جتي ڪولھي برادري جي ماڻهن سان ملاقات ڪري سندن مسئلا ٻڌا ۽ يقين ڏياريو ته پيپلزپارٽي اقليتي برادرين جي حقن جي تحفظ لاءِ پرعزم آهي ان کان پوءِ وفد گبول اسٽاپ پهتو جتي روڊ حادثي ۾ فوت ٿيندڙ منگلا مهيشوري جي تڏي تي پهچي وارثن سان تعزيت ڪئي ۽ کين حوصلو ڏنو ان کان علاوه گلاب ڀيل ڳوٺ جي چار ماڻهن جي سيلابي ريلهي ۾ فوت ٿيڻ تي به سندن وارثن سان دلي همدردي جو اظهار ڪيو مکي اوڌامل ۽ ساٿين ڪانجي ڀيل ڳوٺ ۾ واقع راما پير مندر ۾ حاضري ڀري ۽ آسي پاسي جي ڳوٺن جي اڳواڻن سان ملاقاتون ڪري علائقائي ۽ سماجي مسئلن تي ڳالهيون ڪيون۔ وفد پاران جلد ئي علائقي ۾ ميڊيڪل ڪيمپ لڳائڻ جو اعلان پڻ ڪيو ويو، جيئن غريب ۽ ضرورتمند ماڻهن کي علاج جون سهولتون فراهم ڪري سگهجن۔