گهوڙاٻاري، ڳاڙهو ۽ ور ۾ رورل گروٿ سينٽرز جي قيام بابت اهم اجلاس

پروجيڪٽ ڊائريڪٽر گهوڙاٻاري ۾ ڊرينيج اسڪيم ۽ ڳاڙهو ۾ واٽر سپلاءِ اسڪيم بابت بريفنگ ڏني

ٺٽو ( ڊر)گهوڙاٻاري، ڳاڙهو ۽ ور ۾ ’رورل گروٿ سينٽرز‘ جي قيام بابت اھم مشاورتي اجلاس، پلاننگ ۽ ڊولپمينٽ کاتي حڪومت سنڌ پاران غربت گهٽائڻ واري حڪمت عملي تحت گهوڙاٻاري، ڳاڙهو ۽ ور ۾ رورل گروٿ سينٽرن جي قيام بابت پروجيڪٽ ڊائريڪٽر سيد جواد مظفر جي صدارت ھيٺ هڪ اھم مشاورتي اجلاس منعقد ٿيو، جنهن ۾ ضلعي انتظاميا، مقامي ادارن ۽ سماجي تنظيمن جي نمائندن شرڪت ڪئي. ان موقعي تي پروجيڪٽ ڊائريڪٽر پاران گهوڙاٻاري ۾ ڊرينيج اسڪيم ۽ ڳاڙهو ۾ واٽر سپلاءِ اسڪيم بابت بريفنگ ڏني وئي ۽ مجوزه سيوريج ٽريٽمينٽ پلانٽ ۽ نيٽ ورڪ جو خاڪو پيش ڪيو ۽ تجويزون طلب ڪيون. سيد جواد مظفر ٻڌايو ته رورل گروٿ سينٽر جو مقصد ويجهن ڳوٺن کي ضروري شيون ۽ خدمتون گهٽ خرچ تي ۽ وڌيڪ ڪارائتي نموني فراهم ڪرڻ آهي. هن چيو ته سنڌ ڪابينا 16 نومبر 2018ع تي غربت گهٽائڻ واري حڪمت عملي جي منظوري ڏني هئي، جنهن لاءِ ابتدائي طور تي يورپي يونين جي مدد سان يونائيٽيڊ نيشنز انڊسٽريل ڊولپمينٽ آرگنائيزيشن ذريعي چئن ضلعن ٺٽو، سجاول، بدين ۽ ٿرپارڪر لاءِ 4900 ملين رپيا مختص ڪيا ويا هئا. ھُن وڌيڪ ٻڌايو ته پائدار پروگرام جيڪو سنڌ جي غربت گهٽائڻ واري حڪمت عملي سان هم آهنگ آهي ۽ پنجن سالن تي ٻڌل يورپي يونين پاران فنڊ ڪيل منصوبي تي عملدرآمد ٿي رهيو آهي. ھن چيو تہ هي پروگرام حڪومت سنڌ ۽ ڪاروباري ادارن کي فني مدد، گرانٽس ۽ عوامي سيڙپڪاري لاءِ گڏيل مالي مدد مهيا ڪري ٿو. ان موقعي تي ضلعي انتظاميا جي نمائندن ايڊيشنل ڊپٽي ڪمشنر ون غلام دستگير شيخ، ڊي ايڇ او ڊاڪٽر صفدر علي شاہ، ، ڊي اي او پرائمري نور سرائي، اسسٽنٽ ڪمشنر گهوڙاٻاري فراز احمد عباسي، اسسٽنٽ ڪمشنر ميرپور ساڪرو نبي بخش سولنگي، اسسٽنٽ ڊائريڪٽر پلاننگ ڊيولپمينٽ سيد جواد حسين شاہ، ٽائون چيئرمين گهوڙاٻاري محمد رمضان پنھور، ٽائون چيئرمين ڳاڙھو حاجي محمد صديقي خاصخيلي ۽ ٻين لاڳيپل انجنيئرن ۽ اسٽيڪ هولڊرن پلاننگ ۽ ڊيولپمينٽ کاتي جي ڪوششن کي ساراهيندي چيو ته پائيدار ترقي لاءِ اسٽيڪ هولڊرن جي شموليت تمام ضروري آهي. ان موقعي تي ڊائريڪٽر پلاننگ ڊيولپمينٽ مس ساره امجد، ڊپٽي ڊائريڪٽر پلاننگ ڊيولپمينٽ مس عظيمه ناصر ۽ ضلعي ڪوآرڊينيٽر ديال داس راٺوڙ پڻ شرڪت ڪئي ۽ رورل گروٿ سينٽر ۽ پائدار پروگرامن جي عملداري بابت تفصيلي ڄاڻ ڏني.