پوليس ذريعي اليڪشن ۾ ٺپا ھڻائي کٽڻ وارا ھاڻي دانھون ڪن پيا: پي ٽي آءِ اڳواڻ لالچند مالھي

نواب تيمور ٽالپر جي ايس ايس پي بابت بيان تي لالچند مالهي جو موقف سامهون اچي ويو

عمرڪوٽ(رپورٽ:ڪانجي مل رکيسر)پ پ ايم پي اي تيمور ٽالپر پاران ايس ايس پي عمرڪوٽ عذير ميمڻ خلاف ڏنل بيان بعد پي ٽي آئي منارٽي ونگ جي مرڪزي صدر ۽ اڳوڻي ايم اين اي لالچند مالھي چيو آھي ته پوليس ذريعي اليڪشن ۾ ٺپا ھڻائي کٽڻ وارا ھاڻي دانھون ڪن پيا. عمرڪوٽ ۾ منشيات سڌي يا اڻ سڌي طرح چونڊيل نمائندا ھلائڻ ٿا. سياسي اڳواڻ جيڪڏھن منشيات بند ڪرائڻ چاھن ٿا تہ عوام جي سامھون حلف ڏين ته منشيات وڪرو ڪندڙن جو ساٿ نه ڏيندا. لالچند مالهي ڪنري ويجھو ڳوٺ ميمڻ ڪنري ۾ صحافين سان ڳالھائيندي وڌيڪ چيو ته گذريل 20 سالن کان ضلعو منشيات جو ڳڙھ بڻيل آھي. هي بنيادي طرح ڪاروباري جيھڙو آھي جيڪو چونڊيل نمائندن ۽ سندس ڇاڙتن ۾ آھي. هنن جي آشيرواڌ بغير پوليس کي ڪوبه ھمت ناهي ته هو منشيات هلائي. لال مالهي سياسي صورتحال ۽ آئين ۾ ترميم بابت چيو ته ذوالفقار ڀٽو جي ٺاهيل آئين کي سندس ڏوھٽي بلاول ڀٽو معرفت ختم ڪيو ويو آھي، عدليا کي ختم ڪيو ويو آھي، صدر تي اڳ به ڪرپشن جا ڪيترائي ڪيسز هلندڙ آھن ان کي ڇوٽ ڏني وئي آھي اهو سڀ ڪجھ عمران خان جي خوف سبب ڪيو پيو وڃي ته هو ايندو ۽ سڀني چورن کي نه ڇڏيندو، جيستائين ملڪ ۾ سياسي استحڪام نه ايندو، عوامي ميڊينٽ کي قبول نه ڪيو ويندو تيسين ملڪ بحران مان نڪري سگهندو.