ملير پوليس پاران چوري ۽ گم ٿيل 70 کان وڌيڪ موبائل فونون هٿ ڪرڻ جي دعويٰ

تازين آپريشنن ۾ اسٽريٽ ڪرائيم ۾ ملوث ڪيترائي وڏا گينگ پڪڙيا ويا آهن: ايس پي ملير ڊاڪٽر عبدالخالق

ملير (رپورٽ: عبدالرشيد مورجھريو) ملير پوليس چوري ۽ گم ٿيل موبائل فونون هٿ ڪرڻ ۾ اهم ڪاميابي حاصل ڪندي 70 کان وڌيڪ موبائل فون انهن جي اصل مالڪن حوالي ڪري ڇڏيون . ان سلسلي ۾ ايس ايس پي ملير آفيس ۾ هڪ خاص تقريب منعقد ڪئي وئي، جنهن ۾ ايس پي ملير ڊاڪٽر عبدالخالق، ٽيڪنيڪل ٽيمون ۽ ٻين پوليس آفيسرن شرڪت ڪئي تقريب دوران بريفنگ ڏني وئي ته ملير پوليس ۽ آءِ ٽي برانچ جديد ٽيڪنالاجي ۽ پيشاورانه مهارت استعمال ڪندي مختلف وارداتن دوران شهرين کان ڦريل يا گم ٿيل موبائل فون ٽريس ڪري هٿ ڪيا۔ سڀئي موبائل فون تقريب دوران ئي سندن اصل مالڪن حوالي ڪيا ويا پوليس موجب تازين آپريشنن ۾ اسٽرٽ ڪرائيم ۾ ملوث ڪيترائي وڏا گينگ پڪڙيا ويا آهن ۽ ڪيترن ئي جوابدارن کي گرفتار ڪيو ويو آهي، جيڪي علائقي ۾ وارداتون ڪري شهرين جا موبائل فون ڦريندا هئا تقريب ۾ موبائل فون واپس ملڻ تي شهرين ملير پوليس جي ڪارڪردگي کي ساراهيو ۽ چيو ته اهڙي بروقت واپسي سان عوام جو پوليس تي اعتماد وڌندو ايس ايس پي ملير ڊاڪٽر عبدالخالق آءِ ٽي ٽيم جي محنت ۽ جديد ٽريڪنگ سسٽم جي ڪاميابي کي ساراهيندي چيو ته ملير پوليس ڏوهارين خلاف منظم حڪمت عملي تحت ڪارروايون جاري رکندي۔ هن وڌيڪ چيو ته شهرين جي تحفظ ۽ سندن مسروقا سامان جي واپسي پوليس جي پهرين ترجيح آهي۔