ميرپورساڪرو جي ماسترياڻي جي معطلي خلاف گڏاپ ۾ به احتجاجي مظاهرو

گلناز جوکيو خلاف هڪ سازش ڪئي وئي، کيس بيگناهه معطل ڪيو ويو آهي، شفاف جاچ ڪرائي وڃي: اڳواڻ

ملير (رپورٽ: عبدالرشيد مورجھريو) گڏاپ ۾ مختلف سياسي، سماجي تنظيمن ۽ علائقي واسين طرفان ميرپور ساڪرو جي استادياڻي ميڊم گلناز جوکيو جي حق ۾ احتجاجي مظاهرو ڪيو ويو جنهن جي اڳواڻي زمان جوکيو ، احسان جوکيو ، سلطان شيخ، جمعه لاسي، پوجا مل ۽ ٻين ڪئي احتجاجي مظاهرو ڪندڙن جو چوڻ هو ته ميڊم گلناز جوکيو بار بار پنهنجي بيگناهي جا بيان ڏئي چڪي آهي، پر ان جي باوجود کيس هڪ منظم سازش جو نشانو بڻايو پيو وڃي۔ مظاهرين مطابق ميڊم گلناز هميشه پنهنجي اسڪول ۽ شاگردن لاءِ ايمانداري سان خدمتون انجام ڏنيون آهن، جڏهن ته هاڻي سندس ئي تعليمي خدمت کي سزا بڻائي پيش ڪيو پيو وڃي مظاهرين چيو ته ميڊم گلناز جاچ ڪميٽي آڏو قرآن پاڪ تي حلفاً بيان پڻ ڏئي چڪي آهي، پر پوءِ به سندس خلاف سازشي طريقا اختيار ڪيا پيا وڃن، جيڪي ڪنهن به طرح مناسب ناهن احتجاج ڪندڙن تعليم کاتي جي وزير ۽ اعلى اختيارين کان مطالبو ڪيو ته ميڊم گلناز جوکيو کي تحفظ فراهم ڪيو وڃي ۽ سموري معاملي جي صاف، شفاف ۽ غيرجانبدارانه جاچ ڪرائي وڃي ته جيئن اصل حقائق سامهون اچي سگهن۔