ڊي سي عمرڪوٽ جي صدارت هيٺ ڊسٽرڪٽ ڪوآرڊينيشن ڪميٽي جو اهم اجلاس

سرڪاري اسڪيمَن جي پيش رفت ۽ ضلعي سطح تي حڪومتي هدايتن جي عملدرآمد تي تفصيلي جائزو ورتو ويو

عمرڪوٽ (رپورٽ:ڪانجي مل رکيسر) ڊپٽي ڪمشنر عمرڪوٽ نويد الرحمن لاڙڪ جي صدارت هيٺ فيڊرل ايپيڪس ڪميٽي ۽ صوبائي ايپيڪس ڪميٽي جي فيصلن تي عملدرآمد بابت قائم ڊسٽرڪٽ ڪوآرڊينيشن ڪميٽي جو اهم اجلاس ڊپٽي ڪمشنر آفيس جي دربار هال ۾ منعقد ٿيو، اجلاس دوران ضلع ۾ امن و امان، سرڪاري کاتن جي ڪارڪردگي، سيڪيورٽي قدمن، جاري سرڪاري اسڪيمَن جي پيش رفت ۽ ضلعي سطح تي حڪومتي هدايتن جي عملدرآمد تي تفصيلي جائزو ورتو ويو، اجلاس ۾ پاڪستان آرمي جي ميجر شرجيل، ايس ايس پي عمرڪوٽ عذير احمد ميمڻ، ايڊيشنل ڊپٽي ڪمشنر ٽو عمران آرائين، اسسٽنٽ ڪمشنر عمرڪوٽ رجب علي سٺيو، اسسٽنٽ ڪمشنر ڪنري محمد خان، اسسٽنٽ ڪمشنر سامارو سنجي ڪمار ترڪيو، اسسٽنٽ ڪمشنر پٿورو غلام علي طارق، ڊپٽي ڊائريڪٽر سوشل ويلفيئر نور محمد شيخ، ڊپٽي ڊائريڪٽر وومين ڊولپمينٽ محمد شاهد راجپوت، ايڪسي اين حيسڪو علي رضا ڀٽي، ايڊيشنل ڊائريڪٽر زراعت عبدالغني عارباڻي، ڊپٽي ڊائريڪٽر لوڪل گورنمينٽ هرش چندر، ايڪسائيز انسپيڪٽر شمير خان، حساس ادارن، آءِ بي، ايم آءِ، آءِ ايس آءِ، سي ٽي ڊي، اسپيشل برانچ، فوڊ کاتو، اطلاعات کاتو، ميونسپل ڪميٽي ۽ ٻين لاڳاپيل کاتن جا عملدار ۽ آفيسر موجود هئا، ان موقعي تي لاڳاپيل کاتن جي آفيسرن پنهنجي پنهنجي ڪارڪردگي رپورٽون پيش ڪيون، جڏهن ته ايپيڪس ڪميٽي جي هدايتن موجب ضلع ۾ سيڪيورٽي کي وڌيڪ مؤثر بڻائڻ، غيرقانوني سرگرمين جي روڪٿام، اسنيپ چيڪنگ ۾ اضافو ڪرڻ ۽ اهم هنڌن تي پوليس ۽ رينجرز جي گڏيل نگراني کي يقيني بڻائڻ جون هدايتون جاري ڪيون ويون، ان موقعي تي ڊپٽي ڪمشنر نويد الرحمن لاڙڪ اجلاس کي هدايت ڪندي چيو ته وفاقي ۽ صوبائي ايپيڪس ڪميٽي جي فيصلن تي 100 سيڪڙو عملدرآمد ضلعي انتظاميه جي پهرين ترجيح آهي، ھن چيو ته سڀئي کاتا باهمي رابطو مضبوط ڪن، ڪنهن به دير يا شڪايت جي صورت ۾ فوري قدم کنيا وڃن، هن واضح ڪيو ته امن امان ۽ عوامي خدمتن بابت ڪنهن به قسم جي ڪوتاهي برداشت نه ڪئي ويندي، هن وڌيڪ هدايت ڪئي ته ضلع ۾ جاري ترقياتي اسڪيمَن کي ٽائيم فريم اندر مڪمل ڪيو وڃي، سرڪاري آفيسن ۾ عوامي سهولتن کي اوليت ڏني وڃي ۽ قانون لاڳو ڪندڙ ادارا ڏوهن ۽ غيرقانوني هٿيارن خلاف سخت ڪارروائي جاري رکن، ان موقعي تي ڊپٽي ڪمشنر سڀني اسسٽنٽ ڪمشنرن کي هدايت ڪئي ته دڪاندار برادري سان گڏجاڻيون ڪري کين پنهنجي منڊي/مارڪيٽن ۾ سي سي ٽي وي ڪيمرا لڳائڻ لاءِ پابند ڪيو وڃي، هن وڌيڪ چيو ته ضلعي جي سڀني شهرن ۾ اينٽي اينڪروچمينٽ مهم هلائي وڃي ۽ سرڪاري زمينن تي ٿيل قبضا فوري ختم ڪرايا وڃن ۽ رپورٽ فراهم ڪئي وڃي، هن اهو پڻ چيو ته جيڪي به غيرقانوني پيٽرول پمپ قائم آهن، تن کي فوري طور تي سيل ڪيو وڃي، آخر ۾ ڊپٽي ڪمشنر سڀني کاتن جي ڪارڪردگي کي ساراهيندي چيو ته وفاقي ۽ صوبائي حڪومتي پاليسين جي موثر عملدرآمد لاءِ ڊسٽرڪٽ ڪوآرڊينيشن ڪميٽي جا اجلاس باقاعدي طور جاري رکيا ويندا ۽ ايندڙ اجلاس ۾ تفصيلي پيش رفت رپورٽ پيش ڪئي ويندي.