عمرڪوٽ: نبي سر ٿر ۾ هٿياربندن هٿان ٻه سڳا ڀائر بيدردي سان قتل، لاش ڪهاڙي سان ڪٽيا ويا

هٿياربندن جي حملي ۾ ٽئين ڀاءُ ڀڄي جان بچائي، ايمبولينس نه ملڻ سبب لاش ويگن ۾ اسپتال منتقل

عمرڪوٽ ( رپورٽ:ڪانجي مل رکيسر) چانڊيا برادري جي ٻن ڌرين ۾ هلندڙ پراڻو تڪرار خونريزي ۾ بدلجي ويو، نبي سر ٿر جي ڀرسان هڪ هوٽل تي هٿياربندن بيگناهه مزدور ڀائرن تي حملو ڪري ڏنو، فائرنگ جي نتيجي ۾ ٻه سڳا ڀائر جان محمد ۽ صابر ولد راڻو چانڊيو بي درديءَ سان مارجي ويا، ذريعن موجب ٻئي مقتول ڀائر ٿر ڪول ڊيم تي مزدوري ڪندا هئا ۽ اڄ صبح ڪم تي وڃڻ کان اڳ هوٽل تي ناشتو ڪري رهيا هئا، ته اوچتو مخالف ڌر جا هٿياربند پهچي ويا ۽ انڌا ڌنڌ فائرنگ شروع ڪري ڏني، فائرنگ کان پوءِ قاتلن لاشن کي ڪهاڙيءَ سان مسخ ڪري فرار ٿي ويا، واقعي کان پوءِ علائقي ۾ شديد خوف ۽ ڏهڪاءُ پکڙجي ويو، مقامي ماڻهن موجب ايمبولينس نه ملڻ سبب لاشون ويگن ذريعي ڪنري اسپتال منتقل ڪيون ويون، پوليس ذريعن مطابق ڊي ايس پي ڪنري غلام مصطفيٰ ڪاڇيلو جي اڳواڻيءَ ۾ مختلف ٿاڻن تان وڏي نفري نبي سر ٿر پهتي، علائقي کي گهيري ۾ وٺي ملزمن جي ڳولا لاءِ ڪاروائي شروع ڪئي وئي آهي، علائقي ۾ سوڳ ۽ غم جي فضا ڇانيل آهي، جڏهن⁠ تہ مقتولن جي وارثن قاتلن جي فوري گرفتاري ۽ انصاف جو مطالبو ڪيو آهي.