عمرڪوٽ ۾ ڪشمير تي ڀارتي قبضي خلاف ڪارو ڏينهن ملهايو ويو، احتجاجي ريلي

ضلعي انتظاميه استادن شاگردن ۽ شھرين پاران احتجاجي ريلي ڪڍي وئي، ڀارت خلاف نعريبازي

عمرڪوٽ (رپورٽ:ڪانجي مل رکيسر) ضلعي انتظاميه عمرڪوٽ پاران 27 آڪٽوبر کي يومِ سياه طور ملهائيندي قبضي هيٺ ڪشمير جي مظلوم عوام سان اظهارِ يڪجهتي لاءِ هڪ وڏي واڪ ريلي جو اهتمام ڪيو ويو، ريلي جي اڳواڻي اسسٽنٽ ڪمشنر عمرڪوٽ رجب علي سٺيو ڪئي، جڏهن ته ريلي ڊپٽي ڪمشنر آفيس عمرڪوٽ کان شروع ٿي ۽ پريس ڪلب عمرڪوٽ تي پهچي اختتام پذير ٿي، ان موقعي تي ڊگري ڪاليج عمرڪوٽ جي پرنسپل پروفيسر عبدالروف سومرو، استادن ۽ شاگردن، گورنمينٽ هائر سيڪنڊري اسڪول نمبر ون عمرڪوٽ جي پرنسپل دليپ ڪمار، شاگردن، ٻين تعليمي ادارن جي استادن گوتم سنگراسي، آغا شهباز، مختلف اسڪولن جي شاگردن، سماجي تنظيمَن جي نمائندن مير حسن آريسر، مولانا عبدالقادر جمالي، پريس ڪلب عمرڪوٽ جي مينيجمينٽ ڪميٽي جي چيئرمين رسول بخش رحيمداڻي، معزز شهرين ۽ ٻين اسٽيڪ هولڊرن وڏي تعداد ۾ شرڪت ڪري ڪشميري عوام سان اظهارِ يڪجهتي ڪئي، ان موقعي تي شرڪت ڪندڙن جي هٿن ۾ بينرز، پلي ڪارڊ هئا ۽ ڪشمير جي حق ۾ نعرا پڻ لڳايا پئي ويا، ان موقعي تي اسسٽنٽ ڪمشنر عمرڪوٽ رجب علي سٺيو ۽ ٻين مقررین ريلي کي خطاب ڪندي چيو ته 27 آڪٽوبر تاريخ جو سياه ترين ڏينهن آهي، جڏهن ڀارتي فوجن غيرقانوني طور ڪشمير تي قبضو ڪيو، هنن عالمي برادري کان مطالبو ڪيو ته هو ڪشمير ۾ انساني حقن جي ڀڃڪڙين جو نوٽيس وٺي ۽ ڪشميرين جي حقِ خوداراديت لاءِ پنهنجو ڪردار ادا ڪري، ان موقعي تي مقررین واضح ڪيو ته پاڪستاني قوم ۽ عمرڪوٽ جا شهري هر فورم تي ڪشميري عوام جي حق ۾ آواز اٿاريندا رهندا ۽ سندن آزاديءَ واري جدوجهد تائين مڪمل ساٿ ڏيندا، ريلي جي آخر ۾ ڪشمير جي آزادي ۽ ڀارتي ظلم جي خاتمي لاءِ خاص دعا پڻ ڪئي وئي.