ايس ايس پي ٺٽو پاران پوليس هيڊڪوارٽر ۾ اردلي روم قائم, 51 پوليس آفيسرن ۽ اهلڪارن خلاف مختلف انتظامي سزائون لاڳو

اهلڪارن جا زيرالتوا شوڪاز نوٽيس ۽ انڪوائريون فائنل ڪيون ويون

ٺٽو (شفيق ڀٽي)ايس ايس پي ٺٽو فاروق احمد بجاراني پاران پوليس هيڊڪوارٽر ٺٽو ۾ اردلي روم جو انعقاد ڪيو ويو، جنهن ۾ ضلعي جي مختلف ٿاڻن ۽ يونٽن سان لاڳاپيل پوليس آفيسرن ۽ اهلڪارن شرڪت ڪئي۔اردلي روم دوران ايس ايس پي ٺٽو اهلڪارن جا شڪايتون، شوڪاز نوٽيس، معطلي ۽ ٻين انتظامي مسئلن جو تفصيلي جائزو وٺي، قانوني طريقيڪار مطابق فيصلا جاري ڪيا۔ايس ايس پي ٺٽو پاران غيرحاضري، ڊيوٽي ۾ غفلت، بدتميزي، نظم و ضبط جي ڀڃڪڙي ۽ منظم ڏوهن جي سرپرستي ۾ ملوث 51 پوليس آفيسرن ۽ اهلڪارن خلاف مختلف انتظامي سزائون لاڳو ڪيون ويون، جڏهن⁠ته ڪيترن ئي اهلڪارن جا زيرالتوا شوڪاز نوٽيس ۽ انڪوائريون فائنل ڪيون ويون۔ان موقعي تي ايس ايس پي ٺٽو فاروق احمد بجاراني چيو ته پوليس ڊپارٽمينٽ ۾ ڊسپلن، ايمانداري ۽ ذميواري سان ڊيوٽي ڪرڻ ئي اصل سڃاڻپ آهي۔ هن چيو ته جيڪي اهلڪار پنهنجي فرضن ۾ ايماندار آهن، انهن جي سٺي ڪارڪردگي تي کين ساراهيو ويندو ۽ انعام ڏنا ويندا۔ايس ايس پي ٺٽو وڌيڪ چيو ته پوليس اهلڪارن کي ڇُٽين، تبادلن ۽ فلاح بابت مسئلن جي حل لاءِ سڌو ايس ايس پي آفيس ٺٽو سان رابطو ڪرڻ گهرجي، جيئن سندن جائز مسئلا جلد حل ٿي سگهن۔هن زور ڏنو ته پوليس اهلڪار ڊيوٽي دوران عوام سان خوش اخلاقي، محبت ۽ تعاون سان پيش اچن، ڇو⁠ته پوليس جو اصل ڪم عوام جي خدمت ۽ تحفظ آهي، نه رڳو قانون لاڳو ڪرڻ۔