عمرڪوٽ ويجهو ڊاڪٽر شاهنواز ڪنڀر قتل ڪيس جي فريادي وڪيل تي مبينا حملو

موٽرسائيڪل تي سوار ٽن ٻٽ ٻڌل هٿياربندن سڌي فائرنگ ڪري ڏني، معجزاڻي طور بچي ويس: ايڊووڪيٽ ابراهيم ڪنڀر

عمرڪوٽ (ڊ ر) عمرڪوٽ ۾ ڊاڪٽر شاھنواز ڪنڀر قتل ڪيس جي ٻڌڻي لاءِ ميرپورخاص ويندڙ ٻن وڪيلن تي صوفي فقير لڳ قاتلاڻو حملو ڪيو ويو، جنهن ۾ ٻئي وڪيل معجزاڻي طور جاني نقصان کان بچي ويا، جڏهن ته جوابدار فائرنگ بعد فرار ٿي ويا، متاثر وڪيل ايڊووڪيٽ ابراھيم ڪنڀر موجب اسان ڊاڪٽر شاھنواز ڪنڀر ڪيس جي ٻڌڻي جي سلسلي ۾ ميرپورخاص وڃي رهيا هئاسين ته موٽر سائيڪل سوار ٽن جوابدارن اسان تي صوفي فقير لڳ روڊ تي فائرنگ ڪئي، ابراھيم ڪنڀر وڌيڪ ٻڌايو ته جوابدارن پهرين اسان کي صوفي فقير وٽان ڪراس ڪيو، پوءِ جڏهن اسان بنگلاڻين جي ڳوٺ لڳ پهتاسين ته اسان تي سڌي فائرنگ ڪئي وئي، خوشقسمتي سان اسان ٻنهي کي ڪو نقصان نه پهتو، هن وڌيڪَ چيو ته اسان تي حملو ڊاڪٽر شاھنواز ڪنڀر قتل ڪيس ۾ نامزد مک جوابدارن طرفان ڪرايو ويو آهي، اهي اسان کي مارائڻ چاهين ٿا، ايڊووڪيٽ ابراھيم ڪنڀر جو چوڻ هو ته اڄ اي ٽي سي ڪورٽ ميرپورخاص ۾ جوابدارن جي ضمانت بابت ٻڌڻي رکيل آهي، مان اتي پريس ڪانفرنس به ڪندس ۽ پوءِ صوفي ٿاڻي تي ايف آءِ آر داخل ڪرائيندس، پوليس موجب فائرنگ ڪندڙن جي سڃاڻپ لاءِ جانچ جاري آهي، جڏهن ته صوفي ٿاڻي ۾ ابتدائي رپورٽ تيار ڪئي پئي وڃي.