اسٽيل مل بند هجڻ باوجود اثاثن جي نيلامي جو سلسلو جاري, ٽرانسفارمر، ٿنڀا ۽ بجليءَ جو ٻيو سامان وڪرو ٿيڻ جو انڪشاف

ٽرانسفارمر، تارون، پول ۽ ٻيو قيمتي سامان وڪرو ڪيو ويو آهي: ذريعا

ملير (رپورٽ: عبدالرشيد مورجھريو)پاڪستان اسٽيل مل بند هجڻ باوجود ان جي قيمتي اثاثن جي نيلامي ۽ وڪري جو سلسلو جاري هجڻ جو انڪشاف سامهون آيو آهي. اسٽيل ٽائون واري علائقي ۾ بجليءَ سان لاڳاپيل ڪروڙين رپين جو سامان وڪرو ٿيڻ بعد پوليس به واقعي واري هنڌ پهچي وئي.ذريعن موجب اسٽيل مل جي ملڪيت ۾ شامل بجليءَ جا ٽرانسفارمر، تارون، پول ۽ ٻيو قيمتي سامان وڪرو ڪيو ويو آهي ذريعن موجب هي سامان گلشن حديد واري علائقي مان لاٿل آهي، جنهن کي ٽينڊر ذريعي وڪرو ڪيو ويو آهي.اسٽيل مل انتظاميا جو چوڻ آهي ته بجليءَ جو سامان باقاعده ٽينڊر ذريعي وڪرو ڪيو ويو آهي ۽ سامان جي حوالي ڪرڻ جو عمل اسٽيل مل آفيسرن جي موجودگي ۾ مڪمل ڪيو پيو وڃي. انتظاميا موجب وڪري جو سمورو عمل قانوني طريقي سان ڪيو ويو آهي.ٻئي پاسي پورهيت يونين اڳواڻ ڌڻي بخش سمون اسٽيل مل جي اثاثن جي وڪري تي سخت احتجاج ڪندي چيو آهي ته اسٽيل مل بند هجڻ باوجود اثاثن کي وڪرو ڪرڻ وڏي ناانصافي آهي. هن چيو ته هڪ پاسي اسٽيل مل مان ڪروڙين رپين جو سامان چوري ٿي رهيو آهي ۽ ٻئي پاسي لڪ ڇپ ۾ اثاثا وڪرو ڪيا پيا وڃن، جيڪو ڳڻتي جوڳي ڳالهه آهي.واقعي بابت پوليس جو چوڻ آهي ته اسٽيل مل انتظاميا کان تفصيل طلب ڪيا ويا آهن. پوليس موجب جيڪڏهن سامان قانوني طريقي سان ٽينڊر ذريعي وڪرو ڪيو ويو آهي ته ان عمل جي به مڪمل جاچ ڪئي پئي وڃي ته جيئن ڪنهن به قسم جي بي ضابطگي کي ظاهر ڪري سگهجي.واقعي بعد پورهيتن ۽ شهري حلقن ۾ بيچيني وڌي وئي آهي، جڏهن ته اسٽيل مل جي اثاثن جي تحفظ ۽ شفافيت بابت سوال اٿاريا پيا وڃن.