وفاق ۽ سنڌ حڪومت جي ايجنڊا تي سنڌ جي ترقي ناھي: اياز لطيف پليجو

نوجوان نئون سال تعليم ۽ جدوجھد لاءِ ارپي ڇڏين، سنڌ حڪومت جي 18 سالن جي حڪومت سئو سال پوئتي ڌڪي ڇڏيو آھي

حيدرآباد(بيورو)قومي عوامي تحريڪ جي سربراھ اياز لطيف پليجي چيو آهي تہ نوجوان نئون سال تعليم ۽ جدوجھد لاءِ ارپي ڇڏين. وفاق ۽ سنڌ حڪومت جي ايجنڊا تي سنڌ جي ترقي ناھي. زراعت کي تباھ ڪري ھارين، آبادگارن ۽ سنڌ جو معاشي قتل ڪيو ويو آھي. پيپلز پارٽي اقتدار خاطر قبيلائي دھشتگردي، ڌاڙيل راڄ، مھانگائي، غربت، درياھ، زمين ۽ وسيلن تي ڌاڙا ھنيا. اياز لطيف پليجي چيو تہ سنڌ حڪومت چاھي ھا تہ سنڌ تعليم، صحت سميت ھر شعبي ۾ دنيا جو مقابلو ڪري ھا پر 18 سالن جي حڪومت سئو سال پوئتي ڌڪي ڇڏيو آھي. سڄي ملڪ ۾ سنڌ جي ڪرپشن جو مقابلو ناھي. نوڪريون ۽ ڊگريون پڪوڙا بنائي وڪرو ڪيون وڃن ٿيون. اياز لطيف پليجي چيو تہ سنڌ کي شفافيت ۽ ميرٽ سان بدلائي سگھجي ٿو. نوجوان علم ۽ سائنسي ذريعي چئلينجز جو مقابلو ڪن. ڳوٺن مان نڪري شھرن ۾ اچن. وڏن شھرن ۾ روزگار ڪن. ٽيڪنيڪل ڪورس ڪن. اسڪالرشپس تحت ٻاھر وڃن. دنيا آجيان لاءِ تيار آھي.اياز لطيف پليجي چيو تہ پيپلز پارٽي اقتدار ۾ اچي سنڌي ماڻھن جي اميدن جي برخلاف ڪم ڪيو آھي. جمھوريت جو نعرو صرف ڏيکاء لاءِ ھنيو آھي، عملي طور عوام دشمن، پورھيت دشمن، اظھار جي آزادي خلاف، عورتن، اقليتن ۽ انساني حقن جي خلاف ڪم ڪيو آھي. جيڪي سردار، وڏيرا، جاگيردار عوام کي نپوڙين، ۽ استحصال ڪن ٿا، انھن کي طاقتور بنايو آھي. سنڌ ۾ آئين ۽ قانون جي حڪمراني ناھي. سنڌ ۾ ڌاڙيلن ۽ جرڳائي ماڻھن جو راڄ آھي. پوليس ۽ انتظاميه ذاتي ۽ سياسي مفادن لاءِ استعمال ڪئي وڃي ٿي.