ٺٽو ضلعي جي عوام ۽ آبادگارن کي معاشي قتل کان بچايو وڃي: الطاف حسين شاهه شيرازي

پاڻي کوٽ ختم ڪري زمينن کي بنجر ٿيڻ ۽ فصلن کي تباهي کان محفوظ ڪيو وڃي: سماجي اڳواڻ

ٺٽو(محمد شفيق ڀٽي)ٺٽي جي سياسي ۽ سماجي اڳواڻ، امن جي سفير سيد الطاف حسين شاهه شيرازي ميڊيا سان ڳالهائيندي چيو آهي ته ٺٽو ضلعي جي عوام ۽ آبادگارن کي معاشي قتل کان بچايو وڃي، زمينن کي بنجر ٿيڻ ۽ فصلن کي تباهي کان محفوظ ڪيو وڃي۔هن چيو ته گذريل هڪ مهيني کان ٺٽو ضلعي ۾ پاڻي بند آهي، جنهن سبب ٺٽي جي عوام ۽ آبادگارن جي فصلن جي حالت انتهائي خراب ٿي وئي آهي۔ آبادگار اوڌر تي ٻج ۽ زرعي دوائون وٺي زمينن ۾ وجهن ٿا ته جيئن فصل تيار ٿيڻ بعد قرض لاهي سگهن، پر پاڻي نه هجڻ سبب آبادگار سخت پريشاني جو شڪار آهن، جڏهن ته زمينون بنجر ٿيڻ ۽ فصلون تباهه ٿيڻ واريون آهن۔سيد الطاف حسين شاهه شيرازي وڌيڪ چيو ته پاڻي جي نيڪال ۽ رسائي لاءِ جيڪي نالا پڪا ڪيا پيا وڃن، انهن جو ڪم سست رفتاري سان هلي رهيو آهي، جنهن سبب پاڻي زمينن تائين نٿو پهچي سگهي۔ جيڪڏهن جلد پاڻي جي رسائي بحال نه ڪئي وئي ته آبادگارن جون تيار فصلون به ختم ٿي وينديون، جيڪا کين مڪمل معاشي تباهي طرف ڌڪي ڇڏيندي۔هن صوبائي اعليٰ عملدارن، ضلعي انتظاميه ۽ چونڊيل نمائندن کان پرزور اپيل ڪئي ته فوري طور تي پاڻي جي رسائي بحال ڪئي وڃي، پڪا نالا ٺاهڻ جو ڪم تيز ڪيو وڃي ۽ ٺٽو ضلعي جي عوام ۽ آبادگارن کي معاشي قتل کان بچايو وڃي ته جيئن هو به خوشحال زندگي گذاري سگهن۔