سنڌ فيس بڪ فرينڊس پاران شهيد بينظيرڀٽو لائبريري سچل ڳوٺ ۾ تقريب

تقريب ۾ مختلف شعبن سان لاڳاپيل نمايان رضاڪارن کي ايوارڊ ۽ سرٽيفڪيٽ پڻ پيش ڪيا ويا

ملير (رپورٽ: عبدالرشيد مورجھريو) سنڌ ۾ سماجي خدمتن ۽ رضاڪارن جي مڃتا لاءِ سرگرم تنظيم “سنڌ فيس بڪ فرينڊس” پاران شهيد بينظير ڀٽو لائبريري، سچل ڳوٺ ڪراچي ۾ رضاڪارن جي عالمي ڏينهن جي مناسبت سان تقريب منعقد ڪئي وئي، جنهن ۾ سنڌ جي مختلف شهرن مان سماجي ڪارڪنن، اديبن، استادن، عورت دانشورن، پورهيت اڳواڻن ۽ شاگردن وڏي انگ ۾ شرڪت ڪئي.تقريب ۾ مختلف شعبن سان لاڳاپيل نمايان رضاڪارن کي ايوارڊ ۽ سرٽيفڪيٽ پڻ پيش ڪيا ويا.تقريب کي خطاب ڪندي سنڌ فيس بڪ فرينڊس جي ڪنوينر احمد سومري چيو 5 ڊسمبر تي سڄي دنيا ۾ رضاڪارن جو عالمي ڏينهن ملهايو ويندو آهي. اسان به هن ڏينهن تي انهن سماجي رضاڪارن کي مڃتا ڏيون ٿا، جيڪي بغير ڪنهن لالچ جي سماج ۾ مثبت تبديلي آڻڻ لاءِ ڪم ڪن ٿا. هر سال هن ڏينهن تي مددگار ۽ سماجي ڀلائي لاءِ ڪم ڪندڙ ماڻهن کي اعزاز سان نوازيو ويندو آهي.ڊاڪٽر ماروي پليجو خطاب ڪندي چيو ته: سنڌ جا رضاڪار ڏينهن هجي يا رات، آفتون هجن يا سانحا هميشه اڳڀرا ۽ سرگرم رهيا آهن. نوجوان سماجي رضاڪار اشفاق سبزوئي چيو رضاڪار ڪنهن به معاشري جو قيمتي اثاثو آهن. اسان وٽ ڪيترين ئي منظم رضاڪار تنظيمن سماج جي ترقي لاءِ شاندار ڪم ڪري رهيون آهن. رضاڪارن جي مڃتا ڏيڻ بهترين عمل آهي. سماجي اڳواڻ ۽ شاعر آغا سعيد چيو جيڪو شخص بنا ڪنهن مفاد جي ٻين جي مدد ڪري، اهو حقيقي رضاڪار ٿو سڏجي. سنڌ فيس بڪ فرينڊس اهڙي خوبصورت روايت کي زنده رکيو آهي. نوجوان سماجي ڪارڪن حنيف سومرو چيو هر انسان جو فرض آهي ته هو سماج ۾ پنهنجي حصي جو ڪردار ادا ڪري. سماجي ڪارڪن عبدالرحمان ڪهيري چيو ڪيترائي ماڻهو رضاڪار طور خدمت ڪن ٿا پر انهن جي خدمت جي مڃتا گهٽ ٿئي ٿي. سنڌ فيس بڪ فرينڊس ڪيترن سالن کان هي کوٽ پوري ڪري رهيو آهي.تقريب ۾ رخسانا سومرو، عقبا بانو، سعود حسين، ڊاڪٽر روي، ارشد عباسي، عمران سومري، اڪسير سومري ۽ ٻين پڻ خطاب ڪيوتقريب ۾ عادل عباسي ۽ وقار لاشاري پنهنجي فن جو پڻ مظاهرو ڪيو، جڏهن تہ م مختلف طبقن جي شخصيتن جي شاندار شرڪت تقريب کي وڌيڪ رونق بخشي.