کراچی میں لرزہ خیز واردات: سابق منگیتر نے خاتون کو قتل کر دیا، خالہ کو فون کر کے اعترافِ جرم

سرجانی ٹاؤن میں خاتون کے قتل کے بعد ملزم نے لاڑکانہ میں اپنی خالہ کو فون کر کے جرم کا اعتراف کیا، مقدمہ درج کر لیا گیا۔

کراچی کے علاقے سرجانی ٹاؤن میں سابق منگیتر کے ہاتھوں خاتون کے قتل کا واقعہ سامنے آیا ہے، جس کا مقدمہ مقتولہ کی والدہ کی مدعیت میں سرجانی تھانے میں درج کر لیا گیا ہے۔ پولیس کے مطابق واقعہ انتہائی سنگین نوعیت کا ہے اور اس کی ہر پہلو سے تفتیش جاری ہے۔ مقدمے کے متن کے مطابق مقتولہ کا اپنے شوہر سے خلع کا مقدمہ عدالت میں زیرِ سماعت تھا۔ واقعے کے روز خاتون پر سر پر پانے سے وار کیا گیا، جبکہ آلۂ قتل جائے وقوعہ پر ہی موجود تھا، جسے پولیس نے تحویل میں لے لیا ہے۔ ایف آئی آر میں مزید بتایا گیا ہے کہ ملزم نے واردات کے بعد لاڑکانہ میں موجود اپنی خالہ کو فون کر کے قتل کرنے کا اعتراف کیا۔ اس فون کال کو بھی تفتیش کا حصہ بنایا جا رہا ہے۔ مقتولہ کی والدہ نے پولیس کو بتایا کہ ان کی بیٹی کا سابق منگیتر چند روز قبل دبئی سے کراچی آیا تھا اور انہی کے گھر میں مقیم تھا۔ واقعے کے روز وہ خود گھر سے باہر تھیں، جب واپس آئیں تو بیٹی کی تشدد زدہ لاش گھر میں پڑی تھی۔ پولیس کے مطابق ملزم واقعے کے بعد فرار ہو چکا ہے، اس کا موبائل فون بند ہے اور گرفتاری کے لیے چھاپے مارے جا رہے ہیں۔ حکام کا کہنا ہے کہ ملزم کو جلد گرفتار کر کے قانون کے کٹہرے میں لایا جائے گا۔