ملير ۾ بلوچ سوشل ويلفيئر ايسوسيئيشن جو اجلاس, زميندار عظيم دهقان بلوچ جي غيرقانوني گرفتاري جي مذمت

محمد يونس بلوچ جي صدارت ۾ اجلاس ٿيو، مبين بلوچ ۽ ٻيا شريڪ

ملير (رپورٽ: عبدالرشيد مورجھريو) بلوچ سوشل ويلفيئر ايسوسيئيشن پاران ملير جي زميندار عظيم دهقان بلوچ جي غيرقانوني گرفتاري ۽ سندس ذاتي زمين تي سنڌ حڪومت پاران زبردستي قبضي خلاف احتجاجي اجلاس ٿيو تنظيم جي صدر محمد يونس بلوچ جي صدارت هيٺ ٿيو.اجلاس ۾ تنظيم جي ميمبرن مبين بلوچ، فيضان بلوچ، حاصل بلوچ، شهزاد بلوچ، سهيل بلوچ، شعيب بلوچ، باسط بلوچ سميت ٻين شرڪت ڪئي. اجلاس دوران عظيم دهقان بلوچ جي زمين تي غيرقانوني قبضي ۽ کيس زبردستي گرفتار ڪرڻ جي سخت لفظن ۾ مذمت ڪئي وئي.اجلاس کي خطاب ڪندي صدر محمد يونس بلوچ ۽ ٻين عهديدارن چيو ته سنڌ حڪومت کي شاهراهه ڀٽو منصوبي لاءِ عظيم دهقان بلوچ جي زمين گهرجي، پر حڪومت قانوني طريقيڪار اختيار ڪرڻ بدران سندس ذاتي زمين تي زبردستي قبضو ڪرڻ چاهي ٿي ۽ کيس بليڪ ميل ڪرڻ لاءِ غيرقانوني طور گرفتار ڪيو ويو آهي، جيڪو سراسر ظلم ۽ ناانصافي آهي.هنن چيو ته جيڪڏهن سنڌ حڪومت کي زمين گهربل آهي ته قانون مطابق زمين جي بدلي زمين فراهم ڪئي وڃي، ڇو ته حڪومت کي ڪنهن به زميندار تي زبردستي دٻاءُ وجهڻ يا سندس حقن کي لتاڙڻ جو ڪو به حق ناهي.اجلاس ۾ مطالبو ڪيو ويو ته زميندار عظيم دهقان بلوچ سان فوري انصاف ڪيو وڃي، سندس غيرقانوني گرفتاري ختم ڪئي وڃي، زمين جي بدلي مناسب زمين ڏني وڃي ۽ بليڪ ميلنگ جا سمورا حربا بند ڪيا وڃن.