ملير : پورٽ قاسم انڊسٽريل ايريا ۾ پورهيتن جي جبري برطرفين خلاف احتجاج

ملير (رپورٽ: عبدالرشيد مورجھريو) پورٽ قاسم انڊسٽريل ايريا ۾ پورهيتن جي جبري برطرفين خلاف احتجاج، پوليس ۽ رينجرز جا اٽالا پهچي وياپورٽ قاسم انڊسٽريل ايريا ۾ قائم هڪ نجي ڪمپني پاران پورهيتن کي جبري طور نوڪرين تان برطرف ڪرڻ خلاف عوامي راڄ تحريڪ جي اڳواڻي ۾ سخت احتجاج ڪيو ويو. احتجاج دوران مظاهرين ڌرڻو هڻي ڪمپني انتظاميا خلاف زوردار نعريبازي ڪئي.احتجاجي مظاهري جي اڳواڻي عوامي راڄ تحريڪ جي اڳواڻن ايڊووڪيٽ خليل شاهه ۽ بلاول لاکو ڪئي، جڏهن ته صورتحال کي ڪنٽرول ۾ رکڻ لاءِ پوليس ۽ رينجرز جا اٽالا به موقعي تي پهچي ويا.احتجاج ڪندڙ پورهيتن جو چوڻ هو ته نجي ڪمپني انتظاميا 50 کان وڌيڪ پورهيتن کي بغير ڪنهن سبب جي جبري طور نوڪرين تان برطرف ڪيو آهي، جيڪا سراسر ناانصافي ۽ غيرقانوني عمل آهي. مظاهرين موجب هو گذريل ڏهن سالن کان وڌيڪ عرصي کان ڪمپني ۾ ايمانداري سان ڪم ڪري رهيا آهن، جتي اسپيئر پارٽس تيار ڪيا ويندا آهن، پر ان جي باوجود کين اوچتو بيدخل ڪيو ويو.پورهيتن جو وڌيڪ چوڻ هو ته روزگار کان محروم ٿيڻ سبب سندن گهرن جا چولا ٻرڻ مشڪل ٿي پيا آهن، جڏهن ته انتظاميا سندن مسئلا ٻڌڻ لاءِ به تيار ناهي.احتجاج ڪندڙن واضح چتاءُ ڏنو ته جيڪڏهن برطرف ڪيل پورهيتن کي فوري طور نوڪرين تي بحال نه ڪيو ويو ته احتجاجي تحريڪ جاري رکندي، ۽ احتجاج جو دائرو وڌيڪ وسيع ڪيو ويندو.