ڊپٽي ڪمشنر ٺٽو جي صدارت ھيٺ حددخلين بابت اجلاس

اجلاس ۾ اي سي شاڪر فهيم، واپاري اڳواڻ، ڊي ايس پي ۽ ٻيا شريڪ

ٺٽو(محمد شفيق ڀٽي) ڊپٽي ڪمشنر ٺٽو سرمد علي ڀاڳت جي صدارت ھيٺ سندس آفيس ۾ تعلقي ٺٽي ۾ جاري اينٽي انڪروچمينٽ ڊرائيو بابت هڪ اهم اجلاس منعقد ٿيو۔ اجلاس ۾ اسسٽنٽ ڪمشنر شاڪر فهيم، چيئرمين ٽائون ڪاميٽي مڪلي، صدر تاجر اتحاد، ڊي ايس پي هيڊڪوارٽر، ٽريفڪ انچارج، ايس ايڇ او اينٽي انڪروچمينٽ سيل، ٽائون آفيسر ٽائون ڪاميٽي مڪلي، سيڪريٽري آر ٽي اي ۽ چيف ميونسپل آفيسر ميونسپل ڪاميٽيءَ شرڪت ڪئي۔ اجلاس دوران غيرقانوني حد دخلين خلاف ڪارروائي تيزي سان جاري رکڻ، شهر ۾ ٽريفڪ جي رواني بهتر بڻائڻ ۽ هيـوي لوڊنگ گاڏين جي ڪراسنگ کي منظم ڪرڻ بابت واضح هدايتون جاري ڪيون ويون۔ ان موقعي تي هڪ خصوصي پيٽرولنگ ٽيم پڻ جوڙي وئي، جنهن کي باقاعده گشت جا حڪم ڏنا ويا ته جيئن حد دخلين جي ٻيهر حوصلا شڪني ڪئي وڃي ۽ ٽريفڪ نظام کي موثر بڻايو وڃي۔ ٻئي طرف ڊپٽي ڪمشنر سرمد علي ڀاڳت اوپن ڊور پاليسي تحت عوام سان سڌي ملاقاتن جو سلسلو پڻ جاري رکيو ۔ روزاني جي بنياد تي وڏي انگ ۾ شهري ڊپٽي ڪمشنر آفيس پهچي پنهنجا مسئلا پيش ڪري رهيا آهن، جن تي فوري نوٽيس وٺندي لاڳاپيل عملدارن کي موقع تي ئي هدايتون جاري ڪيون پيون وڃن۔ ڊپٽي ڪمشنر جو چوڻ آهي ته عوامي شڪايتن جو بروقت ازالو ضلعي انتظاميه جي اولين ترجيح آهي ۽ ڪنهن به قسم جي دير يا غفلت برداشت نه ڪئي ويندي۔ شهرين هن قدم کي خوش آئند قرار ڏيندي اميد ظاهر ڪئي آهي ته هن پاليسي سان مسئلن جي حل ۾ نمايان سڌارو ايندو ۽ انتظاميه ۽ عوام وچ ۾ رابطو وڌيڪ مضبوط ٿيندو.