ور شهر واسڻ عورت جو بااثرن خلاف احتجاج، بااثرن تي تشدد ۽ گهر تي قبضي جو الزام

بااثر گهر جي زمين تي مالڪي جي دعوي ڪري رهيا آهن: مريم ملاح

ٺٽو( محمد شفيق ڀٽي) ور شهر لڳ ڳوٺ نصير واه جي رهواسڻ مسمات مريم زال عبدالرزاق عرف پپو ملاح، عوامي پريس ڪلب ٺٽو ۾ صحافين آڏو دانهون ڪندي الزام هنيو آهي ته واپڊا پاور هائوس ور ڀرسان سرڪاري زمين تي سندن چاليهه سالن کان گهر قائم آهي، جتي هو پنهنجي نياڻين سان رهندي اچي رهي هئي. هن الزام هنيو ته ڪجهه مبينا بااثر غير مقامي لينڊ گريبر ماڻهن ساڳي زمين تي مالڪي ظاهر ڪري ڇڏي آهي، جنهن بااثر ليبڊ گريبر علائقي جي بااثر ماڻهن حبيب آگرو، محمدالرحيم آگرو، الهڏنو ڪوڙولائي ۽ اسو ڪوڙولائي سميت ٻين جي مدد سان کيس ۽ سندس نياڻين کي تشدد جو نشانو بڻائي گهر مان بي دخل ڪري ڇڏيو آهي. متاثره عورت موجب، جوابدارن نه صرف کيس گهر کان محروم ڪيو پر گهر جو سامان پڻ کڻي ويا. هن خدشو ظاهر ڪيو ته ساڳيا ماڻهو کيس جان کان مارڻ جون ڌمڪيون به ڏئي رهيا آهن، جنهن سبب هو پنهنجي نياڻين سميت دربدر زندگي گذارڻ تي مجبور آهي. متاثره مسمات مريم اپيل ڪئي جنرل عاصم منير، سنڌ هاءِ ڪورٽ جي چيف جسٽس، صوبائي وزير حاجي علي حسن زرداري ۽ سيد حسين شاه شيرازي سميت سنڌ جي ساڃاهه وندن فوري نوٽيس وٺي کيس انصاف فراهم ڪن. هن چتاءُ ڏنو ته جيڪڏهن کيس انصاف نه مليو ته هو پنهنجي نياڻين سميت پاڻ ساڙڻ تي مجبور ٿيندي.