دبئي ۾ سنڌي ٻولي جي ماهر ڊاڪٽر فهميده حسين پاران اياز لطيف پليجو ۽ نور الهديٰ شاهه جي مان ۾ آجياڻو

سنڌ ۾ مزاحمت جو جذبو پيدا ڪرڻو آ، فن سان، شاعري سان، علم سان، ادب سان. سنڌ ۾ سنڌي ماڻهن کي زنده رهڻو آ: اياز لطيف پليجو

حيدرآباد (پ ر) دبئي ۾ سنڌي لينگويج اٿارٽي جي اڳوڻي چيئرپرسن ۽ ڪراچي يونيورسٽي جي سنڌي ڊپارٽمينٽ جي اڳوڻي چيئرمين سنڌي ٻولي جي ماهر ڊاڪٽر فهميده حسين پاران قومي عوامي تحريڪ جي سربراھ ۽ نامور قانوندان ۽ اديب، دانشور اياز لطيف پليجو ۽ نامور ليکڪہ ۽ ڊرامانگار نورالھدئ شاھ جي مان ۾ آجياڻو ڏنو ويو آجياڻي ۾ دبئي ۾ رهندڙ سنڌي انجنئيرز، ڊاڪٽرز، آئي ٽي ايڪسپرٽرس سميت سنڌ مان آيل آئيني ۽ قانوني ماهرايڊووڪيٽ ساحر اياز لطيف پليجو شرڪت ڪئي. ان موقعي تي قومي عوامي تحريڪ جي سربراھ اياز لطيف پليجي ڳالھائيندي چيو تہ سنڌ ۾ مزاحمت جو جذبو پيدا ڪرڻو آ، مزاحمت جو جذبو ايندو ، فن سان، شاعري سان، علم سان، ادب سان. سنڌ ۾ سنڌي ماڻهن کي زنده رهڻو آ ۽ ڳاٽ اوچو ڪري رهڻو آهي تہ انهن کي سائنس سان ۽ سياست سان ڳنڍڻو پوندو، سائنسي ڄاڻ، سياست، شفافيت، ڪردار جي بلندي ۽ ميريٽ اهي هٿيار آهن جنهن سان سنڌي قوم ۽ سنڌ ڌرتيء ايندڙ مقابلي جي دور ۾ جٽا ڪري سگهندا.اياز لطيف پليجي چيو تہ سنڌ جي هر ڊويزن ۾ هڪڙي اهڙي يونيورسٽي کپي جتي سائنس جي حقيقي تعليم هجي، تحقيق ۽ ريسرچ هجي، هن چيو تہ سنڌ حڪومت سموري سنڌ ۾ وڻ وڍرائي ڇڏيا آهن، پاڻي وڪڻي ڇڏيو آهي، زرعي زمينن کي تباھ ڪري ڇڏيو آهي ۽ وڏن شهرن ۾ رڳو گٽرن جو اٿليل پاڻي آهي، گندگي ۽ عذاب آهي، بک ۽ بيروزگاري آهي، اياز لطيف پليجي چيو تہ سنڌ جا ساڃاھ وند آواز بلند ڪن تہ سنڌ پبلڪ سرورس ڪميشن جون نوڪريون ميريٽ تي ملڻ گهرجن، سنڌ جي سمورن پڇڙي جي آبادگارن کي پاڻي ملي ۽ سنڌ ۾ صنعتون لڳڻ. اياز لطيف پليجي چيو تہ صنعتڪاري کان سواء ۽ زراعت کان سواء سنڌ ترقيء نہ ڪري سگھندي. اياز لطيف پليجي چيو تہ سنڌي قوم جي بقاءَ جو واحد رستو علم، سجاڳي ۽ شعور آهي. سنڌي ماڻهن کي پنهنجي ايندڙ نسل کي تعليم سان ليس ڪري پنهنجن پيرن تي بيهارڻو پوندو.علم سان، سائنس سان، برابري سان، رواداري سان، امن سان، محنت سان ۽ ميرٽ سان سنڌي نوجوانن جڙڻو پوندو . وڏا مقصد حاصل ڪرڻ لاءِ صبح شام محنت ڪيو. جھالت، وھمن ۽ ڌاڳن ڦيڻن جي ماريل سنڌ ظلمن ۽ ناانصافين جو مقابلو ڪونہ ڪري سگھندي، اڳتي وڌڻو آھي تہ جديد علمن، ڏاھپ ۽ سائنس سان جُڙڻو پوندو. اياز لطيف پليجي چيو تہ سنڌ جو تعليمي نصاب جديد، انسان دوست ۽ سائنٽيفڪ ھجڻ گھرجي نوجوان سنڌ ۾ ڏوھن ۽ جھالت جو رستو روڪين ڪرپٽ پيپلزپارٽي جي حڪمرانن سنڌ ۾ ميريٽ جو جنازو ڪڍي ڇڏيو آھي سنڌ پبلڪ سروس ڪميشن ذريعي ميرٽ کي قتل ڪري ڪڙورين روپيا وٺي نوڪريون وڪرو ڪيون وڃن ٿيون . نورالهدئ شاھ ڳالهائيندي چيو تہ سنڌ جو عوام هاڻي آهستي آهستي پنهنجي حقن جي باري ۾ آگاھ ٿئي پيو ۽ اڳتي نڪري پيو، پر اڃان وڌيڪ علم جي ۽ وڌيڪ ادب جي ڄاڻ جي ضرورت آهي، سنڌ جو نوجوان ميريٽ ۾ يقين ڪري اڳتي نڪرندو تہ هن لاء دروازا کليل هوندا، هن وڌيڪ چيو تہ سنڌ ۾ نياڻين جي تعليم پاڻ سڀني جي ذميداري آهي، ان لاء سڀني کي ڪردار ادا ڪرڻو پوندو. ڊاڪٽر فهميده حسين ڳالهائيندي چيو تہ سنڌي ٻولي اسان سڀني جو ڳانڍاپو ۽ وجود جو بنياد آهي. سنڌي ماڻهو جنهن بہ دنيا جي ڪنڊ ڪڙڇ ۾ هجن انهن کي پنهنجي اولاد کي سنڌي ٻولي پڙهائڻ گهرجي ۽ سيکارڻ ۽ لکڻ سيکارڻ گهرجي. هن وڌيڪ چيو تہ سنڌ ۾ جيترا وڌيڪ ڪتاب هوندا جيتري وڌيڪ ٻولي سان محبت ۽ تحقيق هوندي اوترو سنڌين جو ڳانڍاپو وڌيڪ جٽادار ۽ ثابت قدم هوندو.