ٺٽو: عيدگاه مڪلي ڀرسان 8 پورهيتن جي گهر کي باهه، الهه تلهه سڙي رک

مندر وٽ راجپوت برادري جي چوڙيون وڪڻي پورهيتن جي گهرن کي باهه ساڙي رک ڪري ڇڏيو

ٺٽو (رپورٽ شفيق ڀٽي) عيدگاه مڪلي ڀرسان واقع مندر لڳ اقليتي راجپوت برادري سان تعلق رکندڙ چوڙيون وڪڻي گذر سفر ڪندڙ ڪرشن، وشال، وڪاش، ببلو، جرينا سميت ٻين جا لڳ ڀڳ ڇهه کان اٺ گهر اوچتو باهه لڳڻ سبب سڙي رک جو ڍير بڻجي ويا۔ باهه سبب گهرن ۾ پيل سندن سڄي عمر جي جمع پونجي، هنڌ بسترا، ٿانوَ ۽ روزمره جو سمورو سامان پڻ سڙي تباهه ٿي ويو، جنهن ڪري متاثر خاندان کليل آسمان هيٺ بي يارو مددگار ويٺل آهن۔ متاثرن موجب اطلاع ڏيڻ باوجود فائر برگيڊ لڳ ڀڳ هڪ ڪلاڪ دير سان پهتي، جڏهن ته 1122 جي فائر برگيڊ جي گاڏي پهريان واقعي واري هنڌ تي پهتي۔ علائقي واسين به پنهنجي مدد پاڻ تحت باهه وسائڻ جي ڀرپور ڪوشش ڪئي، پر تيستائين گهڻو نقصان ٿي چڪو هو ۽ سندن سڀ ڪجهه سڙي رک بڻجي ويو۔ متاثر خاندانن صوبائي وزير حاجي علي حسن زرداري، رياض شاهه شيرازي، ضلعي چيئرمين عبدالحميد پنھور، ڊپٽي ڪمشنر ٺٽو ۽ ٻين اختيارين کي اپيل ڪئي آهي ته سخت سياري جي موسم ۾ سندن ڪو به اجھو باقي ناهي رهيو، تنهن ڪري فوري طور مالي امداد، عارضي رهائش ۽ بنيادي ضرورتن جي فراهمي کي يقيني بڻايو وڃي۔ علائقي ۾ پيش آيل هن افسوسناڪ واقعي سبب اقليتي برادري ۾ ڳڻتي جي لهر ڇانيل آهي ۽ سماجي حلقن پڻ متاثرن جي فوري واھر جو مطالبو ڪيو آهي.