ماءُ ۽ ٻار جي پهرين 1000ڏينهن تي ڌيان ڏيڻ ضروري آهي: ڊي ايڇ او ٿرپارڪر

مٺي ۾ سنڌ انٽيگريٽڊ هيلٿ اينڊ پاپوليشن پروگرام جي 1000 ڏينهن سان لاڳاپيل آگاهي پروگرام منعقد

مٺي (ڊ ر) ڊسٽرڪٽ هيلٿ آفيس ٿرپارڪر پاران منعقد ڪيل سنڌ انٽيگريٽڊ هيلٿ اينڊ پاپوليشن پروگرام تحت مٺي ۾ "پهرين 1000 ڏينهن" جي موضوع تي هڪ آگاهي پروگرام منعقد ڪيو ويو، جنهن ۾ ماءُ ۽ ٻار جي زندگي جي پهرين 1000 ڏينهن دوران صحت ۽ غذائيت جي اهميت تي خاص روشني وڌي وئي. آگاهي پروگرام ۾ ضلعي هيلٿ آفيسر ٿرپارڪر ڊاڪٽر ليکراج سارنگاڻي، سينئر پبلڪ هيلٿ اسپيشلسٽ ڊاڪٽر ضياءَ چنا، ايڊيشنل ضلعي هيلٿ آفيسر ڊاڪٽر جئي پرڪاش، تعلقي ميڊيڪل آفيسر، ايل ايڇ ڊبليو، ويڪسينيٽرز، ميل موبلائيزر ۽ ٿرپارڪر جي سو کان وڌيڪ لاڳاپيل ملازمن شرڪت ڪئي.ان موقعي تي ڳالهائيندي ڊاڪٽر ليکراج سارنگاڻي چيو ته مائرن ۽ ٻارن جي صحت تي خاص ڌيان ڏيڻ جي ضرورت آهي ته جيئن اهي پنهنجي زندگي صحتمند طريقي سان شروع ڪري سگهن. هن چيو ته نون ڄاول ٻارن ۽ مائرن جا پهريان 1000 ڏينهن تمام اهم آهن، هن دوران صحت، غذائيت ۽ باقاعده طبي چيڪ اپ کي يقيني بڻايو وڃي. هن وڌيڪ چيو ته نون ڄاول ٻارن کي مختلف بيمارين کان بچڻ لاءِ وقت تي ويڪسينيشن ڪرائڻ گهرجي، جڏهن ته شروعاتي ڏينهن ۾ مسلسل چيڪ اپ سان انهن جي صحت جي حالت جو بروقت اندازو لڳائي سگهجي ٿو. جيڪڏهن ماءُ يا ٻار جي صحت اطمينان بخش نه هجي ته انهن کي فوري طور تي اسپتال منتقل ڪيو وڃي ته جيئن بهتر علاج ممڪن ٿي سگهي. ڊي ايڇ او چيو ته پهرين 1000 ڏينهن دوران صحت ۽ غذائيت بابت آگاهي فراهم ڪرڻ ضروري آهي ته جيئن هڪ صحتمند سماج جي تخليق ٿي سگهي. ان حوالي سان، صحت کاتي جي عملي کي مثبت ۽ بهتر رويي سان خدمت ڪرڻ جي ضرورت آهي ڇاڪاڻ ته هڪ خوشگوار رويو پڻ بهتر نتيجا ڏئي ٿو. هن اعلان ڪيو ته پروگرام تحت ڳوٺاڻن علائقن ۾ هڪ آگاهي مهم شروع ڪئي ويندي. تقريب جي آخر ۾، سٺي ڪارڪردگي ڏيکاريندڙ ملازمن ۾ تعريف ۽ تربيتي سرٽيفڪيٽ پڻ ورهايا ويا.