ملير: تاريخي چوڪنڊي قبرستان ڏانهن ويندڙ رستي تي گندو پاڻي بيٺل

انتظاميه جي لاپرواهي سبب تاريخي ورثي تي ايندڙ سياح پريشانين کي منهن ڏيڻ تي مجبور

ملير (رپورٽ: عبدالرشيد مورجھريو) ابراهيم حيدري ٽائون ۽ يوسي چوڪنڊي جي مبينه لاپرواهي سبب سنڌ جي تاريخي ورثي چوڪنڊي قبرستان ڏانهن ويندڙ مک رستو سيوريج جي گندي پاڻي هيٺ اچي ويو آهي، جنهن ڪري زائرين ۽ سياحن کي سخت ڏکيائين کي منهن ڏيڻو پئجي رهيو آهي۔چوڪنڊي قبرستان جي انتظاميا موجب ڪيترائي ڀيرا لاڳاپيل اختيارين کي آگاهي ڏيڻ باوجود به سيوريج جو نظام درست نه ڪيو ويو آهي۔ انتظاميا جو چوڻ آهي ته هنن ابراهيم حيدري ٽائون انتظاميا سان گڏ ميونسپل ڪمشنر ۽ ميئر ڪراچي مرتضیٰ وہاب کي به لکت ۾ درخواستون ڏنيون آهن، پر اڃا تائين ڪو عملي قدم نه کنيو ويو آهي۔ انتظاميا جو چوڻ آهي ته چوڪنڊي قبرستان هڪ اهم تاريخي ۽ ثقافتي ماڳ آهي، جتي ڏيهي توڙي پرڏيهي سياح ۽ وفد ايندا رهن ٿا۔ رستي جي خراب حالت سبب نه رڳو اچ وڃ ۾ ڏکيائي پيش اچي رهي آهي پر سنڌ جي تاريخي سڃاڻپ به متاثر ٿي رهي آهي۔چوڪنڊي قبرستان جي انتظاميا اختيارين کان مطالبو ڪيو آهي ته فوري طور سيوريج جو نظام بهتر بڻايو وڃي، گندي پاڻي جي نيڪال جو بندوبست ڪيو وڃي ۽ رستي جي صفائي ڪرائي وڃي ته جيئن هن اهم تاريخي ورثي تائين آساني سان رسائي ممڪن بڻائي سگهجي۔