عمرڪوٽ ۾ ڪرڪيٽ ٽورنامينٽ، رحيمداڻي ڪرڪيٽ اڪيڊمي جي شاندار فتح

رحيمداڻي ڪرڪيٽ اڪيڊمي 13 اوورن ۾ 3 وڪيٽن جي نقصان تي آساني سان ميچ کٽي ورتي

عمرڪوٽ (رپورٽ:ڪانجي مل رکيسر) ٻئي الحاج مرحوم سيد علي مردان شاهه ڊسٽرڪٽ اينڊ آل سنڌ هارڊ بال ڪرڪيٽ ٽورنامينٽ رحيمداڻي ڪرڪيٽ اڪيڊمي جي سرپرستي ۽ اسپانسرشپ هيٺ جاري آهي، ٽورنامينٽ جي هڪ اهم ميچ ۾ تاج ڪرڪيٽ اڪيڊمي ٽاس کٽي پهرين بيٽنگ جو فيصلو ڪيو، پر مقرر ڪيل 15 اوورن ۾ 110 رنسون ٺاهي آل آئوٽ ٿي وئي، تاج اڪيڊمي پاران زڪاءُ الله 18، بابو 13 ۽ زبير 12 رنسون ٺاهيون، جڏهن ته ٻيو ڪو به بيٽسمين نمايان ڪارڪردگي نه ڏيکاري سگهيو، رحيمداڻي ڪرڪيٽ اڪيڊمي جي نوجوان ۽ جادوگر بالر اويس علي ڀٽي شاندار بالنگ ڪندي 3 اوورن ۾ صرف 14 رنسون ڏئي 4 وڪيٽون حاصل ڪيون ۽ مخالف ٽيم جي مضبوط بيٽنگ لائن کي تباهه ڪري ڇڏيو، جواب ۾ رحيمداڻي ڪرڪيٽ اڪيڊمي 13 اوورن ۾ 3 وڪيٽن جي نقصان تي 111 رنسون ٺاهي ميچ آساني سان کٽي ورتو، ڪامران ساند 34 ۽ ڪرن 33 رنسون ٺاهي نمايان ڪردار ادا ڪيو، ميچ جو بهترين رانديگر اويس علي ڀٽي قرار ڏنو ويو، جنهن کي نامياري اسپورٽس مين رسول بخش رحيمداڻي پاران ڪپ ۽ نقد انعام ڏنو ويو، ان موقعي تي رحيمداڻي ڪرڪيٽ اڪيڊمي جي صدر رسول بخش رحيمداڻي صحافين سان ڳالهائيندي چيو ته ٽيم جي سڀني رانديگرن بهترين فيلڊنگ ۽ بالنگ جو مظاهرو ڪيو، جنهن سبب مضبوط تاج ڪرڪيٽ اڪيڊمي کي 110 رنسن تي محدود ڪيو ويو، هن نوجوان بالر اويس علي ڀٽي جي ڪارڪردگي جي ساراهه ڪندي چيو ته سندس شاندار بالنگ ئي فتح جي بنياد بڻجي، رحيمداڻي ڪرڪيٽ اڪيڊمي جي لڳاتار ڪاميابين سبب ٽيم فائنل ۾ پهتي آهي، جنهن تي رانديگرن ۽ انتظاميه خوشي جو اظهار ڪيو، ھي اھم ميچ ڏسڻ لاءِ وڏي انگ ۾ نامياري اسپورٽس مين، سماجي اڳواڻ، علائقي جا معزز ماڻهون ۽ ڪرڪيٽ جا شوقين گرائونڊ ۾ موجود هئا، تماشائين رانديگرن جي شاندار ڪارڪردگي تي ڀرپور داد ڏنو ۽ ميچ دوران جوش ۽ جذبو ڏسڻ وٽان هو.