ٺٽي ضلعي ۾ طوفاني برساتن سبب ڪيترائي گھر ڊھي پٽ، هڪ فوت، 20کان وڌيڪ زخمي

ٺٽو، ميرپور ساڪرو، گھارو، ٻگھاڻ، ڪيٽي بندر ، گجو، مڪلي، پيرپٺو درگاھ شخي جميل شاهه ٻين شهرن ۾ برسات

ٺٽو( شفيق ڀٽي) گذريل رات کان ٺٽي ضلعي ۾ تيز طوفاني برساتون ۽ هوائون سبب وڏي تباهي مچي وئي آهي. سوين ڪچا گھر ڊھي پٽ پئجي ويا، ڪيترائي ماڻهو زخمي۽ هڪ ڄڻو فوت ٿي ويو آهي. تفصيل موجب ضلعي جي مختلف شهرن ميرپور ساڪرو، گھارو، ٻگھاڻ، ڪيٽي بندر ، ٺٽي شھر، گجو، مڪلي، پيرپٺو درگاھ شخي جميل شاهه ٻين ننڍن وڏن شھرن توڙي ڳوٺن۾ ڪيترن ئي ڪچن گھرن جون ڇتيون ۽ ديوارون ڪري پٽ ٿي ويون.گھارو ڳوٺ حاجي خان چانڊيو ۾ ڪيترن ئي گهرن کي نقصان پهتو، جڏهن ته حسن ۽ سندس پٽ روشن چانڊيو زخمي ٿيا. مڪلي لڳ ڄام واه ڀرسان ڳوٺ سومار خاصخيلي ۾ هڪ گهر جي ڇت ڪري پئي جنھن سبب ماڻهن جي شديد زخمي ٿيڻ جو واقعو ٿيو.مجموعي طور 20 کان مٿي زخمي مختلف ھيلٿ سينٽرن۾ آندا ويا، جن ۾ عورتون ۽ ٻار پڻ شامل آهن. زخمين مان ڪجهه کي وڏين اسپتالن ڏانهن منتقل ڪيو ويو. طوفان سبب ڪيترن ئي وڻن، سولر پليٽن ۽ بيٺل فصلن جهڙوڪ ڪڻڪ ۽ سبزين کي شديد نقصان پهتو. هارين ۽ زميندارن کي مالي نقصان برداشت ڪرڻو پيو. برساتي پاڻي ٺٽي شهر ۽ مڪلي جي ڪچي آبادين ۾ بيهجي ويو، بجلي ۽ مواصلات جو نظام پڻ سخت متاثر ٿيو، ڪيترن ئي پراڻن بجلي پولن کي نقصان پهتو، ۽ شهرن ۽ ڳوٺن ۾ بجلي بند ٿي وئي.. مختلف علائقن جي متاثر رهاڪن سنڌ حڪومت، ضلعي انتظاميه ۽ چونڊيل نمائندن کان اپيل ڪئي آهي ته ٿيل نقصان جي سروي ڪرائي متاثر خاندانن جي سهائتا ڪئي وڃي۽ ٿيل نقصان جو ازالو ڪيو وڃي. ٻي پاسي ڊپٽي ڪمشنر ٺٽو سرمد علي ڀاگت رات دير سان شهر جي مختلف علائقن جو دورو ڪري برساتي پاڻي جي نيڪال جو تفصيلي جائزو ورتو. ڊپٽي ڪمشنر لاڳاپيل عملدارن کي هدايت ڪئي ته پاڻي جي فوري نيڪال کي يقيني بڻايو وڃي، سڀئي ڊي واٽرنگ مشينون ۽ ڊسپوزلز فعال رهن، ۽ صورتحال جي مسلسل نگراني ڪئي وڃي.