قائد آباد ۾ ڪوسٽر جو موٽر سائيڪل کي ٽڪر، 2موٽر سائيڪل سوار فوت

ملير (رپورٽ: عبدالرشيد مورجھريو) قائد آباد جي علائقي ايبٽ ڪمپني لڳ تيز رفتار ڪوسٽر موٽر سائيڪل کي ٽڪر هنيو جنهن سبب ٻه ڄڻا موقع تي ئي فوت ٿي ويا ريسڪيو ذريعن موجب، حادثو ان وقت پيش آيو جڏهن موٽر سائيڪل سوار پنهنجي رستي تان گذري رهيا هئا ته اوچتو هڪ بي قابو ڪوستر کين زوردار ٽڪر هنيو۔ ٽڪر ايترو شديد هئو جو ٻنهي ڄڻن ٿڏي تي ئي دم ڏنو اطلاع ملڻ تي امدادي ٽيمون فوري طور واقعي واري هنڌ پهتيون ۽ فوت ٿيلن جا لاش ايمبولينس ذريعي جناح اسپتال ڪراچي منتقل ڪيا ويا۔ پوليس موجب فوت ٿيلن جي سڃاڻپ لعل ولد ارمڪا عمر 25 سال ۽ گوپي ولد سيتل عمر 27 سال طور ٿي آهي۔ شروعاتي ڄاڻ موجب ٻئي محنتي مزدور هئا ۽ پنهنجي ڪم لاءِ وڃي رهيا هئا۔حادثي بعد ڪوسٽر جو ڊرائيور موقعي تان فرار ٿي ويو، جڏهن ته پوليس واقعي جو ڪيس داخل ڪري وڌيڪ جاچ شروع ڪري ڇڏي آهي۔ علائقي واسين هن افسوسناڪ حادثي تي سخت ڏک ۽ ڪاوڙ جو اظهار ڪندي مطالبو ڪيو آهي ته ٽريفڪ قانونن تي سختي سان عمل ڪرائڻ سان گڏ لاپرواهه ڊرائيورن خلاف سخت ڪارروائي ڪئي وڃي