هر ماڻهو ٿليسميا ۾ مبتلا ٻارن ۽ مريضن جي زندگيون بچائڻ لاءِ بلڊ ڊونيشن مهم ۾ حصو وٺي: ڊي سي ٺٽو

خصوصي رت عطيو مهم 6 اپريل کان 10 اپريل تائين سول اسپتال مڪلي ۾ قائم ڪيل خاص وارڊ ۾ جاري رهندي

ٺٽو( شفيق ڀٽي) انساني همدردي ۽ سماجي ذميواري جي جذبي کي هٿي ڏيڻ لاءِ ڊپٽي ڪمشنر ٺٽو سرمد علي ڀاگت شهرين کي خلوص دل سان اپيل ڪئي آهي ته هو ٿليسميا ۾ مبتلا ٻارن ۽ مريضن جي زندگيون بچائڻ لاءِ بلڊ ڊونيشن مهم ۾ ڀرپور شرڪت ڪن۔ ضلعي انتظاميا جي جاري ڪيل اعلاميه موجب خصوصي رت عطيو مهم 6 اپريل کان 10 اپريل 2026 تائين سول اسپتال مڪلي ۾ قائم ڪيل خاص وارڊ ۾ جاري رهندي، جتي رضاڪاراڻي طور رت جا عطيا وصول ڪيا ويندا، جيئن ٿليسميا جي مريضن کي وقت سر ۽ مسلسل رت جي فراهمي کي يقيني بڻائي سگهجي۔ ڊپٽي ڪمشنر سرمد علي ڀاگت پنهنجي پيغام ۾ چيو آهي ته رت جو هڪ عطيو ڪنهن جي سڄي زندگي بچائي سگهي ٿو، ۽ اهو ئي ذميواري جو احساس هڪ مهذب سماج جي سڃاڻپ آهي۔ هن زور ڏنو ته شهري هن نيڪ ڪم ۾ وڌي چڙهي حصو وٺن ۽ انسانيت جي خدمت ۾ پنهنجو ڪردار ادا ڪن۔ هن وڌيڪ چيو ته گڏيل سهڪار سان نه رڳو قيمتي جانيون بچائي سگهجن ٿيون پر سماج ۾ ايثار، محبت ۽ ڀائيچاري جي روشن مثال به قائم ڪري سگهجي ٿي۔