گڏاپ ٽائون ۾ پيئڻ جي پاڻي جو بحران، خميسو جوکيو جي ڳوٺاڻن جو ڌرڻو

ڪيترن ئي ڏينهن کان پيئڻ جو پاڻي موجود ناهي، سخت تڪليفن ۾ مبتلا آهيون: رهواسي

ملير (رپورٽ: عبدالرشيد مورجھريو) گڏاپ ٽائون ۾ پيئڻ جي پاڻي جي سخت کوٽ خلاف خميسو جوکيو ڳوٺ جي رهواسين احتجاجي ڌرڻو هنيو، جنهن سبب گڏاپ سٽي موٽر وي تي ايندڙ ويندڙ ٽريفڪ مڪمل طور معطل ٿي وئي۔احتجاج ڪندڙن پاڻي جي مسلسل کوٽ ۽ لاڳاپيل ادارن جي بي ڌياني خلاف روڊ تي ٽائر ساڙي سخت احتجاج ڪيو۔ مظاهرين جو چوڻ هو ته گڏاپ ٽائون جي مختلف علائقن ۾ ڪيترن ئي ڏينهن کان پيئڻ جو پاڻي موجود ناهي، جنهن ڪري عورتن، ٻارن ۽ بزرگن کي سخت تڪليفن کي منهن ڏيڻو پئجي رهيو آهي۔احتجاج دوران مظاهرين روڊ بلاڪ ڪري ڇڏيو، جنهن سبب موٽر وي تي گاڏين جون ڊگهيون قطارون لڳي ويون ۽ مسافرن کي سخت پريشاني پيش آئي احتجاج ڪندڙن حڪومت ۽ لاڳاپيل ادارن خلاف نعريبازي پڻ ڪئي ۽ فوري طور پاڻي فراهم ڪرڻ جو مطالبو ڪيو۔مظاهرين موجب ڪيترن ڏينهن کان گهرن ۾ پاڻي ناهي ٽينڪر مافيا مهانگي اگهن تي پاڻي وڪرو ڪري رهيو آهي شڪايتن باوجود اختيارين ڪو نوٽيس نه ورتو علائقي واسي پاڻي جي کوٽ سبب سخت پريشان آهن مظاهرين خبردار ڪيو ته جيڪڏهن فوري طور پاڻي جي فراهمي بحال نه ڪئي وئي ته احتجاج جو دائرو وڌايو ويندو ۽ وڌيڪ اهم شاهراهن کي پڻ بند ڪيو ويندو۔اطلاع ملڻ تي پوليس ۽ انتظاميه جي نفري واقعي واري هنڌ پهچي وئي ۽ مظاهرين سان ڳالهيون شروع ڪيون ويون۔ اختيارين طرفان مسئلو جلد حل ڪرڻ جي خاطري پڻ ڪرائي وئي۔واضح رهي ته گڏاپ ٽائون جي مختلف علائقن ۾ پاڻي جي کوٽ جو مسئلو گهڻي عرصي کان جاري آهي، جڏهن ته تازو ڏينهن ۾ صورتحال وڌيڪ سنگين بڻجي وئي آهي، جنهن ڪري شهري سراپا احتجاج بڻجي ويا آهن۔ علائقي واسين حڪومت سنڌ، واٽر بورڊ ۽ ضلعي انتظاميه کان فوري نوٽيس وٺي مستقل بنيادن تي پاڻي جي فراهمي يقيني بڻائڻ جو مطالبو ڪيو آهي۔