ٺٽي شهر ۾ رولو ڪتن جو آزار وڌي ويو، شهري خوف ۾ مبتلا

ٺٽو ( ڊر)ٺٽي شهر ۾ رولو ڪتن جو وڌندڙ انگ شهرين لاءِ سخت خطرو بڻجي ويو آهي، جڏهن ته ميونسپل ڪميٽي هن مسئلي تي ضابطو آڻڻ ۾ مڪمل طور ناڪام نظر اچي رهي آهي۔ شهر جي مختلف علائقن، مين روڊن، پارڪن ۽ مسجدن ڀرسان ڪتن جا ٽولا عام ڏسڻ ۾ اچن ٿا، جنهن سبب شهري خوف ۾ مبتلا آهن۔ تفصيل موجب گذريل رات درگاھ شاهه گوهر گنج ڀرسان هڪ نوجوان تي رولو ڪتن حملو ڪيو، جنهن جي نتيجي ۾ هو موٽرسائيڪل تان ڪري سخت زخمي ٿي پيو۔ متاثر نوجوان کي ڳڻتي جوڳي حالت ۾ اسپتال منتقل ڪيو ويو۔ شهرين جو چوڻ آهي ته اهڙي قسم جا واقعا هاڻي معمول بڻجي چڪا آهن، خاص ڪري آمري اسٽاپ ۽ ٻين علائقن ۾ ڪتن جا ٽولا ماڻهن تي حملو ڪن ٿا، جنهن ڪري ٻار ۽ عورتون به محفوظ ناهن رهيون۔ ماهرن موجب گرمي جي شروعات سان اپريل مهيني دوران ڪتن جي افزائش وڌي وڃي ٿي، جنهن ڪري خطرو وڌيڪ وڌي وڃي ٿو۔ هنن جو چوڻ ھو ته ان جي مستقل حل لاءِ ڪتا ڪنٽرول مهم (ABC پروگرام) شروع ڪيو وڃي. شهرين مطالبو ڪيو ته جيڪڏهن فوري قدم نه کنيا ويا ته احتجاج ۽ قانوني ڪارروائي ڪئي ويندي، جڏهن ته قانون موجب خطرناڪ جانورن کي ڪنٽرول ۾ نه رکڻ ڏوهه آهي۔ شهرين جو چوڻ آهي ته جيڪڏهن بروقت قدم نه کنيا ويا ته هي مسئلو هڪ وڏي انساني الميي جي صورت اختيار ڪري سگهي ٿو۔