عمرڪوٽ ۾ سماجي تنظيم اسپارڪ پاران اسٽيڪ هولڊرن سان اهم اجلاس

اجلاس ۾ وڪيل منور علي پلي، مير محمد نھڙيو، بنسي مالهي، شوڪت سومرو ۽ ٻين جي شرڪت

عمرڪوٽ (رپورٽ:ڪانجي مل رکيسر) سماجي تنظيم اسپارڪ پاران اسٽيڪ هولڊرن سان اهم اجلاس، مزدورن ۽ ٻارن جي حقن بابت گڏيل قدمن تي زور سوسائٽي فار پروٽيڪشن آف دي رائٽس آف دي چائلڊ (SPARC) پاران عمرڪوٽ ۾ اسٽيڪ هولڊرن سان هڪ اهم اجلاس منعقد ڪيو ويو، جنهن ۾ وڪيل منور علي پلي، مير محمد نھڙيو، بنسي مالهي، شوڪت سومرو، تعليم کاتي ۽ اطلاعات کاتي سميت، سماجي تنظيمن عبدالجبار ڪنڀر، شيوارام سوٽھڙ، عابد نھڙي، سول سوسائٽي سروپ چند مالھي، سماجي تنظيم اسپارڪ پاران ڊسٽرڪٽ مينيجر سورج مل، خديجه بلوچ، محمد حسيب، عبدالرحمان پلي ۽ ٻين لاڳاپيل عملدارن شرڪت ڪئي۔ ان موقعي تي تقريب کي خطاب ڪندي ڊسٽرڪٽ مئنيجر اسپارڪ سورج مل چيو تہ اڄوڪي گڏجاڻي جو بنيادي مقصد مزدورن جي حقن، باندي پورهئي جي خاتمي ۽ ٻارن جي تحفظ بابت مسئلن تي بحث مباحثو ڪري گڏيل حڪمت عملي ترتيب ڏيڻ هو، خاص طور تي ڀٽن تي ڪم ڪندڙ مزدورن جي حالتن کي بهتر بڻائڻ تي زور ڏنو ويو ۽ عمرڪوٽ ضلعي ۾ ڀٽن تي ڪم ڪندڙ مزدورن جي بااختياري لاءِ قدم کنيا پيا وڃن. ھن وڌيڪ چيو تہ اسان بٺن ٽي ٻارن کي نان فارمل ايجوڪيشن ڏيئي رھيا آھيون ۽ ان سان گڏ بنيادي سھولتون پڻ فراهم ڪري رهيا آهيون۔ اجلاس دوران شرڪت ڪندڙن ان ڳالهه تي زور ڏنو ته مزدورن ۽ انهن جي خاندانن کي بنيادي سهولتون جهڙوڪ تعليم، صحت ۽ سماجي تحفظ فراهم ڪرڻ انتهائي ضروري آهي۔ مقررِين چيو ته گڏيل ڪوششن سان ئي باندي پورهئي جهڙي سنگين مسئلي کي ختم ڪري سگهجي ٿو ۽ ٻارن کي محفوظ ۽ روشن مستقبل ڏئي سگهجي ٿو۔ تقريب ۾ مختلف شرڪت ڪندڙن پنهنجون تجويزون پيش ڪيون ۽ ان ڳالهه تي اتفاق ڪيو ويو ته اهڙيون گڏجاڻيون مستقبل ۾ به جاري رکيون وينديون ته جيئن عملي قدمن ذريعي مثبت تبديلي آڻي سگهجي۔ آخر ۾ ڊسٽرڪٽ مئنيجر SPARC سورج مل سڀني شرڪت ڪندڙن جو ٿورو مڃيو ۽ اميد ظاهر ڪئي ته گڏيل تعاون سان مزدورن ۽ ٻارن جي حقن جي تحفظ لاءِ موثر اڳڀرائي ٿيندي۔