ڊپٽي ڪمشنر ٺٽو سرمد علي ڀاڳت جي صدارت هيٺ ڊسٽرڪٽ ڪوآرڊينيشن ڪميٽي جو اجلاس

ٺٽو(محمد شفيق ڀٽي)ڊپٽي ڪمشنر ٺٽو سرمد علي ڀاڳت جي صدارت هيٺ ڊسٽرڪٽ ڪوآرڊينيشن ڪميٽي جو اجلاس دربار هال مڪلي ۾ منعقد ٿيو۔ اجلاس ۾ ضلعي اندر سماجي ۽ سياسي هم آهنگي کي ھٿي ڏيڻ، عوامي رابطا بهتر بڻائڻ ۽ خاص طور تي نوجوانن کي مثبت سرگرمين ڏانهن راغب ڪرڻ تي زور ڏنو ويو۔ ڊپٽي ڪمشنر سرمد علي ڀاگت اجلاس کي خطاب ڪندي چيو ته نوجوانن کي راندين، ثقافتي ۽ تعميري سرگرمين ۾ مصروف رکڻ وقت جي اهم ضرورت آهي، جيئن کين منفي رجحانن کان پري رکيو وڃي۔ هن لاڳاپيل کاتن کي هدايت ڪئي ته هو پاڻ ۾ سهڪار سان اهڙا پروگرام ترتيب ڏين، جيڪي نوجوانن جي صلاحيتن کي اجاگر ڪن۔ اجلاس ۾ ان ڳالهه تي پڻ زور ڏنو ويو ته وفاقي ۽ صوبائي سطح تي ٿيندڙ فيصلن تي مؤثر عملدرآمد يقيني بڻايو وڃي، جڏهن ته عوامي مسئلن ۽ شڪايتن جي فوري ازالي لاءِ مربوط حڪمت عملي اختيار ڪئي وڃي۔ ڊپٽي ڪمشنر چيو ته ڪميٽي جو هر مهيني باقاعدي اجلاس منعقد ڪيو ويندو ۽ ڪارڪردگي رپورٽ لاڳاپيل فورمن ڏانهن اماڻي ويندي، جڏهن ته مختلف کاتن وچ ۾ هم آهنگي کي وڌيڪ مؤثر بڻايو ويندو۔ ان موقعي تي ضلعي ۾ امن، ترقي ۽ نوجوانن جي ڀلائي لاءِ گڏيل قدم جاري رکڻ جي عزم جو اظهار ڪيو ويو۔ اجلاس ۾ ايڊيشنل ڊپٽي ڪمشنر ٽو وليد ڊاوچ، اسسٽنٽ ڊائريڪٽر لوڪل گورنمينٽ اريجه بتول، ڊسٽرڪٽ اسپورٽس آفيسر علي اظهر، چيف آفيسر ضلع ڪائونسل علي حيدر شاهه، چيف ميونسپل آفيسر سهيل شاهه، ڊسٽرڪٽ انفارميشن آفيسر محفوظ علي سومرو سميت ٻين لاڳاپيل آفيسرن شرڪت ڪئي۔