سچ سوشل ويلفيئر پاران مستحق ماڻهن لاءِ راشن ۽ عيد جا ڪپڙا ورهائڻ جي تقريب منعقد

مزاحيه اداڪار علي گل ملاح پاڻ مستحق ماڻهن جي گهرن تائين وڃي راشن پهچايو ۽ انهن سان ملاقاتون ڪيون

ڪراچي (رپورٽر) سچ سوشل ويلفيئر ايسوسيئيشن پاران هر سال جيان هن سال به غريب ۽ مستحق ماڻهن لاءِ راشن ۽ عيد جا ڪپڙا ورهائڻ جي تقريب منعقد ڪئي وئي، جنهن مان وڏي انگ ۾ ضرورت مند خاندانن فائدو حاصل ڪيو. هن نيڪ عمل جو مقصد مهانگائي جي هن دور ۾ غريب ماڻهن جي مدد ڪرڻ ۽ کين عيد جي خوشين ۾ شامل ڪرڻ آهي. هن فلاحي سرگرمي ۾ ايف آر ڊي پي پڻ ڀرپور سهڪار ڪيو ۽ ڏهه راشن جا پيڪيج فراهم ڪيا، جن ۾ روزمرهه جي استعمال جون شيون شامل هيون. منتظمين موجب اهڙا قدم مستقبل ۾ به جاري رکيا ويندا ته جيئن وڌيڪ کان وڌيڪ مستحق ماڻهن تائين مدد پهچائي سگهجي. ان موقعي تي ناليواري مزاحيه اداڪار علي گل ملاح پاڻ مستحق ماڻهن جي گهرن تائين وڃي راشن پهچايو ۽ انهن سان ملاقاتون ڪيون. هن چيو ته انسانيت جي خدمت اسان سڀني جي ذميواري آهي ۽ هو پنهنجي وس آهر هن مشن کي جاري رکندا. هن وڌيڪ چيو ته جيڪي ماڻهو هن مرحلي ۾ رهجي ويا آهن، انهن تائين به جلد راشن ۽ عيد جا ڪپڙا پهچايا ويندا. سچ سوشل ويلفيئر ايسوسيئيشن جي چيئرمين عبدالوهاب سومرو ميڊيا سان ڳالهائيندي چيو ته ادارو ڪيترن ئي سالن کان غريب ۽ مستحق ماڻهن جي خدمت ۾ مصروف آهي. هن چيو ته مخير ماڻهن جي سهڪار کانسواءِ اهڙا ڪم ممڪن ناهن، ۽ ان حوالي سان علي گل ملاح جو ڪردار ساراهه جوڳو آهي، جنهن نه صرف مالي پر عملي طور به حصو ورتو. هن وڌيڪ چيو ته اهڙيون فلاحی سرگرميون سماج ۾ ڀائيچاري، محبت ۽ ذميواري جي احساس کي وڌائين ٿيون، ۽ جيڪڏهن صاحبِ حيثيت ماڻهو اڳتي وڌي مدد ڪن ته غربت جي خاتمي ۾ وڏي مدد ملي سگهي ٿي.