ايس ايس پي شڪارپور محمد ڪليم جي صدارت هيٺ اجلاس ٿي گذريو

شھرين سان خوش اخلاقي، ٿاڻن جي رڪارڊ جي درستگي ۽ سيڪيورٽي انتظامن بابت هدايتون جاري

شڪارپور (احسان ابڙو ) ايس ايس پي شڪارپور محمد ڪليم جي صدارت هيٺ ضلعي جي سڀني ٿاڻن جي محرر اسٽاف سان هڪ خاص اجلاس منعقد ٿيو. اجلاس ۾ شھرين سان خوش اخلاقي، ٿاڻن جي رڪارڊ جي درستگي ۽ سيڪيورٽي انتظامن بابت اهم هدايتون پڻ جاري ڪيون ويون. اجلاس ۾ هدايت ڪئي وئي ته ٿاڻن جا رڪارڊ مڪمل طور تي اپڊيٽ ۽ درست رکيا وڃن، جڏهن ته پوليس نفري جي موثر تعيناتي داخلي ۽ خارجي رستن ۽ ٻين اهم هنڌن تي يقيني بڻائي وڃي. ايس ايس پي شڪارپور هدايت ڪئي ته امام بارگاهن، مسجدن ۽ ٻين عبادتگاهن ۾ باجماعت نماز جي وقت مناسب پوليس نفري موجود هجي، خاص طور تي شھادت يومِ حضرت عليؓ جي موقع تي ڪانٽي جنسي پلان تحت سخت سيڪيورٽي انتظامات يقيني بڻايا وڃن. عبادت ڏانهن اچڻ وارن ماڻهن جي مڪمل چيڪنگ ۽ جسماني تلاشي کان پوءِ ئي اندر وڃڻ جي اجازت ڏني وڃي، ته جيئن ڪنهن به ناخوشگوار واقعي کان بچي سگهجي. اجلاس ۾ زور ڏنو ويو ته FIR يا ٻين معاملا ۾ شھري کان ڪنهن به قسم جي ڪرپشن برداشت نه ڪئي ويندي ۽ اهڙن عملدارن خلاف سخت محڪماني ڪارروائي ڪئي ويندي. ايس ايس پي شڪارپور محمد ڪليم جو چوڻ هو ته پوليس ۽ عوام جي وچ ۾ اعتماد خوش اخلاقي، شفافيت ۽ قانون جي برابر عملداري سان مضبوط ٿئي ٿو، تنهن ڪري سخت لھجو، غير مناسب رويي ۽ اختيارن جو ناجائز استعمال هرگز برداشت نه ڪيو ويندو. بهترين ڪارڪردگي ۽ مثالي رويي وارن محرر اسٽاف جي حوصلا افزائي پڻ ڪئي ويندي. اجلاس ۾ ريڊر ٽو ايس ايس پي، شيٽ ڪلرڪ، هيڊ ڪلرڪ ۽ ٻيو لاڳاپيل عملو پڻ موجود هو