ٺٽي ضلعي اندر شاديءَ جي تقريبن ۽ ٻين سماجي گڏجاڻين بابت نئون ضابطه اخلاق جاري

شادي هال ، بينڪوئٽ هالز ، لانز، ريسٽورنٽس ۽ هوٽلن ۾ ٿيندڙ تقريبن لاءِ مهمانن جي تعداد ۽ کاڌي بابت پابنديون لاڳو

ٺٽو (محمد شفيق ڀٽي)ڊپٽي ڪمشنر ٺٽو سرمد علي ڀاڳت ضلعي اندر شاديءَ جي تقريبن ۽ ٻين سماجي گڏجاڻين بابت نئين ضابطه اخلاق تي عملدرآمد يقيني بڻائڻ لاءِ نوٽيفڪيشن جاري ڪري ڇڏيو آهي ، جنهن تحت شادي هال ، بينڪوئٽ هالز ، لانز، ريسٽورنٽس ۽ هوٽلن ۾ ٿيندڙ تقريبن لاءِ مهمانن جي تعداد ۽ کاڌي بابت پابنديون لاڳو ڪيون ويون آهن ۔ جاري ڪيل نوٽيفڪيشن موجب شاديءَ جي تقريبن ، وليمي ۽ ٻين سماجي گڏجاڻين ۾ شرڪت ڪندڙ مهمانن جو تعداد 200 ماڻهن کان وڌيڪ نه هوندو، جڏهن ته تقريبن ۾ صرف هڪ ڊش پيش ڪرڻ جي اجازت هوندي ۔ ڊپٽي ڪمشنر هدايت ڪئي آهي ته سڀئي شادي هال مالڪ ، ايونٽ آرگنائيزرز ، ڪيٽرنگ سروسز ۽ ٻين لاڳاپيل ماڻهن حڪومتي هدايتن تي سختي سان عملدرآمد کي يقيني بڻائين ۔ هن چيو ته ضلعي انتظاميه پاران ان سلسلي ۾ مسلسل نگراني ڪئي ويندي ۽ ضلعي جي سمورن تعلقي ۾ اسسٽنٽ ڪمشنر پنهنجن علائقن ۾ انهن هدايتن تي عملدرآمد جي نگراني ڪندا۔ نوٽيفڪيشن ۾ واضح ڪيو ويو آهي ته هدايتن جي ڀڃڪڙي ڪندڙن خلاف لاڳاپيل قانونن تحت سخت قانوني ڪارروائي ڪئي ويندي۔ ڊپٽي ڪمشنر موجب اهي حڪم فوري طور لاڳو ٿيندا ۽ ايندڙ حڪمن تائين نافذ رهندا۔