ملير جي گدامن ۾ لکين ٽن ڪڻڪ خراب، خوراڪ کاتي تي لاپرواهي جو الزم

منرل پمپ ۽ پپري جي گدامن ۾ رکيل ڪڻڪ مان لکين ٻوريون خراب حالت ۾ پيل

ملير(رپورٽ: عبدالرشيد مورجھريو) خوراڪ کاتي جي مبينا لاپرواهي سبب ملير جي مختلف گدامن ۾ موجود لکين ٽن ڪڻڪ خراب ٿيڻ جو انڪشاف ٿيو آهي. منرل پمپ ۽ پپري جي گدامن ۾ رکيل ڪڻڪ مان لکين ٻوريون خراب حالت ۾ پيل آهن، جڏهن ته فلور مل مالڪن خراب ڪڻڪ کڻڻ کان انڪار ڪري ڇڏيو آهي.ذريعن موجب جنوري کان مارچ تائين فلور مل مالڪن گدامن مان لڳ ڀڳ 50 لک ٻوريون ڪڻڪ حاصل ڪيون، پر کين معياري ڪڻڪ فراهم نه ٿي سگهي. ڪڻڪ ۾ مٽي جي ملاوٽ ۽ خراب معيار باوجود گدام خالي ڪرايا ويا. ان دوران لڳ ڀڳ 50 هزار ٻوريون خراب ڪڻڪ جون ڦٽو ڪري ضايع ڪيون ويون، جڏهن ته 8 لک کان وڌيڪ ٻوريون ڪڻڪ اڃا به خراب حالت ۾ پيل آهن.ان حوالي سان پاڪستان فلور ملز ايسوسيئيشن جي چيئرمين عبدالجنيد عزيز چيو آهي ته فلور مل مالڪ خراب ڪڻڪ کڻڻ تي ان ڪري مجبور ٿيا ته جيئن حڪومت سموري خراب ڪڻڪ ختم ڪري سگهي. هن چيو ته گدامن ۾ اڃا به لڳ ڀڳ 10 لک ٻوريون خراب ڪڻڪ جون موجود آهن ۽ ڪڻڪ ۾ ملاوٽ ڪري وڏي زيادتي ڪئي وئي آهي، جنهن سبب قومي خزاني کي نقصان پهتو آهي.هوڏانهن ڊسٽرڪٽ فوڊ ڪنٽرولر سڪندر شاھ جو چوڻ آهي ته گدامن ۾ 15 لک ٻوريون صاف ڪڻڪ پڻ موجود آهن، جڏهن ته برسات سبب خراب ٿيل پراڻي ڪڻڪ جون 5 لک 70 هزار ٻوريون آهن، جيڪي ڪابينا جي منظوري بعد نيلام ڪيون وينديون.عوامي حلقن مطالبو ڪيو آهي ته ڪڻڪ جي خراب ٿيڻ واري معاملي جي شفاف جاچ ڪرائي ذميوارن خلاف ڪارروائي ڪئي وڃي ته جيئن قومي وسيلن جي وڌيڪ ضايع ٿيڻ کان بچي سگهجي.