گهارو ڀرسان قتل ٿيل نوجوان واري واقعي جو جوابدار گرفتار، ڏوهه جو اعتراف

جوابدار راج وير ولد راجيش هريجن کي گرفتار ڪري ورتو آهي جنهن ڏوهه باسيو آهي: پوليس

ٺٽو (ڊ ر)گهارو ڀرسان فلٽر پلانٽ واري علائقي ۾ پيش آيل غير مسلم نياڻي جي قتل واري سنسني خيز واقعي کي ٺٽه پوليس رڳو 24 ڪلاڪن اندر ٽريس ڪري مبينا جوابدار کي گرفتار ڪري ورتو آهي. پوليس موجب 10 ۽ 11 مارچ 2026 جي وچ واري رات فلٽر پلانٽ گهارو ڀرسان جبل واري هنڌ تي نامعلوم جوابدار هڪ نوجوان عورت کي قتل ڪري فرار ٿي ويو هو. مقتولا جي سڃاڻپ چيتنا ڌي پريم چند هريجن طور ٿي، جيڪا ڪراچي جي ڪينٽونمينٽ بورڊ صدر علائقي جي رهواسي ٻڌائي وڃي ٿي ۽ سندس عمر لڳ ڀڳ 22 کان 24 سال ٻڌائي پئي وڃي. واقعي جي اطلاع تي پوليس فوري طور موقعي تي پهچي لاش تحويل ۾ وٺي قانوني ڪارروائي بعد پوسٽ مارٽم لاءِ رورل هيلٿ سينٽر گهارو منتقل ڪيو. مقتولا جي مامي روي ڪمار هريجن جي فرياد تي ٿاڻو ڌاٻيجي تي قلم 302، 311 ۽ 34 تعزيرات پاڪستان تحت ڪيس نمبر 39/2026 داخل ڪيو ويو. ان واقعي جو سخت نوٽيس وٺندي ايس ايس پي ٺٽو فاروق احمد بجاراني واقعي واري هنڌ جو دورو ڪيو ۽ سينيئر آفيسرن تي ٻڌل خاص ٽيم جوڙي، جنهن ۾ ڊي ايس پي ساڪرو شهزاد سومرو، ايس ايڇ او ڌاٻيجي مبين پرهياڙ ۽ ايس ايڇ او گهارو محمد علي ڊامرا شامل هئا. پوليس ٽيم جديد طريقي سان جاچ ڪندي رڳو 24 ڪلاڪن اندر بلائنڊ مرڊر ڪيس کي ٽريس ڪري جوابدار راج وير ولد راجيش هريجن کي گرفتار ڪري ورتو. پوليس موجب ابتدائي جاچ دوران جوابدار ڏوهه جو اعتراف پڻ ڪري ورتو آهي، جڏهن ته وڌيڪ جاچ جاري آهي. ايس ايس پي ٺٽو ڪامياب ڪارروائي تي پوليس ٽيم کي شاباش ڏيندي سندن حوصلا افزائي لاءِ تعريفي اسناد ڏيڻ جو اعلان پڻ ڪيو آهي.