ايرانين کان سکو، صبر، دليري ۽ طويل، منظم ۽ بيخوف مزاحمت مخالفن کي ٿڪائي وجھندي آھي: اياز لطيف پليجو

آئون سڄي سنڌ کيڙي، ان ۾ پر امن ڊگھي مزاحمت، علم ۽ عقل جا ٻج پيو پوکيان

حيدرآباد (بيورو) قومي عوامي تحريڪ جي سربراھ اياز لطيف پليجي چيو آهي تہ محڪومن ۽ مظلومن جي قافلي مان جيڪي بہ وڏي فيصله ڪن جنگ جا ٺڪاءُ ھڻن، جھيڙن، ٽڪرائن، ھٿيارن، آخري مقابلن جا اعلان ڪن، متان ويا آھيو اچئون ٿا، واريون ھوائي خبرون ڪن، اھي يا تہ جاھل آھن يا دشمنن جا ايجنٽ آھن، اھي آخر ۾ سوديبازي ڪري، اوھان کي مارائڻ ۽ سنڌ کي ناڪام ڪرڻ چاھين ٿا. اياز لطيف پليجي چيو تہ ايرانين کان سکو، صبر، دليري ۽ طويل، منظم ۽ بيخوف مزاحمت مخالفن کي ٿڪائي وجھندي آھي. آئون سڄي سنڌ کيڙي، ان ۾ پر امن ڊگھي مزاحمت، علم ۽ عقل جا ٻج پيو پوکيان، ڪجھ وقت لڳندو پر پنھنجي ان جرئت، حق ۽ صبر واري طويل جدوجھد مان گونچ ضرور ڦٽندا، گُل ضرور ٽڙندا.اياز لطيف پليجي چيو تہ حڪمران رڳو اھو سوچين تہ آخر آھي بي پناھ پئسا گڏ ڪري ڇا ڪندا. ڪيڏانھن ڪندا ايتر. پئسن کي. ڇا حاصل ڪندا. ملڪ کان ٻاھر وڃي رھندا تہ انھن جي اولاد کي بہ خبر آھي تہ اھي پئسا ڪرپشن جا آھن ۽ پوءِ جڏھن پيرسن ٿي ويندا تہ انھن جو اولاد ڪنھن سيٽزن ھوم ۾ ڇڏي ايندو.ڪرپشن ڪري ملڪ، سنڌ ۽ ڪروڙين ماڻھن کي تباھ ڪرڻ بدران ماڻھن جي دلين ۾ جاءِ ٺاھيو. اياز لطيف پليجي چيو تہ ست ڪڙور سنڌي پيپلزپارٽي مان اميد ڪرڻ بدران سندن سنڌ حڪومت جي خراب حڪمراني خلاف جدوجھد تيز ڪن. اصل طاقت ھاري، پورھيت ۽ محنت ڪش عوام آھي. سنڌي ماڻھو مصلحتن خاموش ويھڻ ۽ ٻين جي اٿڻ جو انتظار ڪرڻ بدران پنھنجي حصي جو ڪردار ادا ڪن، ناانصافيون بدراشت نہ ڪيو، حق ۽ سچ جو آواز بلند ڪيو. حڪمران ڪمزور آھن. عوام کي خاموشي ڪرپٽ حڪمرانن کي طاقتور بنائي ٿي.