ملير ۾ منشيات جي حوالي سان جاڳرتا ريلي ڪڍي وئي، تقريب منعقد

سرڪاري اسڪول پورٽ قاسم ۾ پروونشل تمباڪو ڪنٽرول سيل جي سهڪار سان جاڳرتا تقريب

ملير (رپورٽ: عبدالرشيد مورجھريو) ملير جي سرڪاري اسڪول پورٽ قاسم ۾ پروونشل تمباڪو ڪنٽرول سيل سنڌ جي سهڪار سان تمباڪو، سگريٽ ۽ گهٽڪي جي وڌندڙ استعمال خلاف جاڳرتا تقريب ۽ ريلي ڪئي وئي، جنهن ۾ استادن، والدين، شاگردن، سماجي شخصيتن ۽ علائقي واسين وڏي انگ ۾ شرڪت ڪئي۔تقريب ۾ پروونشل تمباڪو ڪنٽرول سيل سنڌ جي اڳواڻن تنوير قائمخاني پروونشل ڪوآرڊينيٽر ۽ بلال ظفر ڊسٽرڪٽ ڪوآرڊينيٽر سميت اسڪول جي هيڊ مس نسيم جهتيال، مهرالله، محمد هاشم، اسد، معشوق، انور، پرھ، رشيده، سعيده، فوزيه، بختاور، ثمرين ۽ ٻين استادن شرڪت ڪئي، جڏهن ته شاگردن ۽ شاگردياڻين منشيات ۽ تمباڪو جي نقصانن بابت تقريرون، ٽيبلو ۽ آگاهي پيغام پيش ڪري خوب داد حاصل ڪئي۔ان موقعي تي خطاب ڪندي پروونشل ڪوآرڊينيٽر تنوير قائمخاني چيو ته پاڪستان ۾ روزاني جي بنياد تي 445 ماڻهو صرف سگريٽ، تمباڪو ۽ گهٽڪي جي استعمال سبب فوت ٿي رهيا آهن، جڏهن ته 1200 ٻار روزانو سگريٽ ۽ گهٽڪو واپرائڻ شروع ڪن ٿا، جيڪا انتهائي ڳڻتي جوڳي صورتحال آهي۔هن چيو ته منشيات خاص طور تمباڪو، سگريٽ ۽ گهٽڪو نوجوان نسل جي صحت، تعليم ۽ مستقبل کي تباهه ڪري رهيا آهن، تنهن ڪري استادن، والدين ۽ سماج جي ذميوار ماڻهن کي گڏجي نوجوانن کي ان لعنت کان بچائڻو پوندو۔ تنوير قائمخاني وڌيڪ چيو ته استاد اسڪولن ۾ شاگردن کي تمباڪو ۽ گهٽڪي جي نقصانن بابت آگاهي ڏيڻ ۾ اهم ڪردار ادا ڪري سگهن ٿا، جڏهن ته گهرن اندر سگريٽ نوشي سبب ٻين گهر ڀاتين جي صحت به متاثر ٿئي ٿي، تنهن ڪري شاگردن کي به گهرن ۽ سماج ۾ آگاهي ڦهلائڻ لاءِ پنهنجو ڪردار ادا ڪرڻ گهرجي۔ تقريب دوران پروونشل تمباڪو ڪنٽرول سيل سنڌ طرفان بهتر ڪارڪردگي ڏيکاريندڙ استادن ۽ شاگردن ۾ سرٽيفڪيٽ پڻ ورهايا ويا۔