نوشهرو فيروز ۾ اعجاز ممنائي جي ڪتاب جي مهورتي تقريب منعقد

سنڌي ادبي سنگت شاخ بچل مهر پاران تقريب منعقد ڪئي وئي

نوشهرو فيروز (ڊر) سنڌي ادبي سنگت شاخ بچل مهر پاران انٽرنيشنل رائٽرز فورم پاڪستان جي مرڪزي چيئرمين ناليواري شاعر ڪالم نويس ۽ شاخ بچل مهر جي ڪائونسلر اعجاز ممنائي جي ڪتاب "هادي سندي هدايت" جي مهورت تقريب پيپلز اسڪول هال ۾ ٿي گذري، جنهن جي صدارت سنگت جي ضلعي رابطه سيڪريٽري سيد مختيار علي شاهه مختيار ڪئي جڏهن ته مهمان خاص پروفيسر جبار ملاح هو. هن تقريب ۾ پروفيسر بخش علي چانڊيو۔ پروفيسر مخدوم اظهار۔ پروفيسر اصغر ڀٽي۔پروفيسر منور علي سرگاڻي۔ امانت وسطڙو۔ زاهد حسين سومرو۔عبدالطيف سولنگي۔استاد اقبال ميمڻ ۽ ٻين مقررن خطاب ڪندي چيو تہ اعجاز ممنائي سنڌي ادب کي ڪيترائي قيمتي ڪتاب ارپي چڪو آهي هن نعت جهڙي نفيس صنف سان پڻ خوب انصاف ڪيو آهي. سندس شاعريءَ جي انفراديت کيس الڳ سڃاڻپ ڏني آهي. هو نہ صرف شاعر پر بهترين نثر نويس پڻ آهي. هو نہ فقط غزل پر نعت، منقبت ۽ مرثيي جو پڻ بهترين شاعر آهي. ان موقعي صاحب ڪتاب اعجاز ممنائي چيو ته اسان وٽ مولود شريف، نبي پاڪ جي ثنا ۽ ساراھ ۾ مخصوص انداز ۾ ڳاتا سُڃاتا وڃن ٿا، پر ان مروج ڪلام ۽ ڳائڻ واري انداز کان هٽي ڪري نعتيه ڪلام کي خاص اهميت حاصل رهي آهي۔هن چيو ته جڏهن به ڪنهن ميلادالنبي جي پروگرام ۾ وڃجي ٿو ته سنڌي نعت چوڻ وارو ڪو ڪو ملي ٿو جڏهن ته ٻين ٻولين ۾ نعت چوڻ تي فخر ڪيو وڃي ٿو انڪري مون محسوس ڪيو ته ان نعتيه ڪلام کي پنهنجي مادري زبان ۾ بيان ڪجي۔ صدارتي خطاب ڪندي نامياري اديب ۽ ضلعي رابطه سيڪريٽري سيد مختيار علي شاه مختيار چيو ته اعجاز ممنائي متحرڪ اديب شاعر ۽ سماج اڳواڻ آهي سندس نعتيه ڪلام روحاني رمزن سان سجايل آهي. مهورتي تقريب ۾ مشهور نعت خوانن استاد غلام مصطفيٰ ٽالپر۔محمد حسين اڄڻ۔ غلام حسن ڪلهوڙو جميل شيخ۔ صابر خانزادو نعتون پڙهي محفل تي روحاني رنگ طاري ڪري ڇڏيو۔ پروگرام ۾ اسٽيج سيڪريٽري جا فرائض گل بقا عمراڻي ادا ڪيا جڏهن ته تقريب جي آخر ۾ مانجهاندي جو اهتمام پڻ ڪيو ويو۔