نوشهروفيروز ۾ روينيو کاتي ۾ هڪ کان 4 گريڊ ۾ ڀرتي لاءِ انٽريوز جاري

ڊي سي آفيس ۾ انٽرويو جي ٻئي ڏينهن تعلقي ڀريا مان 567 شارٽ لسٽ اميدوارن حصو ورتو

نوشهروفيروز (ڊ. ر) روينيو کاتي ۾ روزگار ۽ ميرٽ کي يقيني بڻائڻ لاءِ، ڊپٽي ڪمشنر آفيس نوشهروفيروز ۾ گريڊ 1 کان 4 تائين مختلف خالي پوسٽن تي ڀرتي لاءِ اميدوارن جا انٽرويو باضابطه طور تي شروع ڪري ڇڏيا آهن. انٽرويو جي ٻئي ڏينهن تعلقي ڀريا مان 567 شارٽ لسٽ ڪيل اميدوارن حصو ورتو. انهن پوسٽن ۾ نائب قاصد، چوڪيدار، سينٽري ورڪرز، ڪوٽار، ڊرائيو ۽ گريڊ 1 کان 4 تائين ٻيون ٽيڪنيڪل ۽ نان ٽيڪنيڪل پوسٽون شامل آهن. سليڪيشن ڪميٽي جي ميمبرن، ايڊيشنل ڊپٽي ڪمشنر ون محمد مستقيم قريشي، ايس اينڊ جي ڊي سيڪشن آفيسر حاڪم علي انڙ، سيد جيئل شاهه ۽ ٻين چيو ته صوبائي حڪومت جي هدايتن موجب، سڀئي ڀرتيون نج ميرٽ، شفافيت ۽ قابليت جي بنياد تي ڪيون پيون وڃن. ڪنهن به قسم جي سفارش يا دٻاءُ تي غور ڪرڻ کان سواءِ، مستحق ۽ اهل اميدوارن کي انهن جو حق ڏنو ويندو ته جيئن سرڪاري کاتن جي ڪارڪردگي کي وڌيڪ بهتر بڻائي سگهجي. گرمي جي شدت کي نظر ۾ رکندي، ضلعي انتظاميا ڊي سي آفيس ۾ انٽرويو لاءِ ايندڙ اميدوارن لاءِ ٿڌي پيئڻ جي پاڻي ۽ ڇانوَ واري ويهڻ واري جاءِ (انتظار جي جاءِ) جو خاص انتظام ڪيو هو. انٽرويو جو هي سلسلو ايندڙ ڪجهه ڏينهن تائين جاري رهندو، جنهن کان پوءِ ڪامياب اميدوارن جي آخري فهرستون ميرٽ جي مطابق جاري ڪيون وينديون.