ایف پی سی سی آئی کا افواج پاکستان کے ساتھ اظہار یکجہتی کے لیے امن واک کا انعقاد

امن، استحکام اور معاشی اصلاحات کو ایک ساتھ آگے بڑھنا چاہیے: عاطف اکرام شیخ، صدر

کراچی(اسٹاف رپورٹر) فیڈریشن آف پاکستان چیمبرز آف کامرس اینڈ انڈسٹری (ایف پی سی سی آئی) کے صدر عاطف اکرام شیخ نے کہا ہے کہ ملک کے اعلیٰ ترین تجارتی ادارک امن، استحکام، قومی یکجہتی اور معاشی ترقی کے حصول کے لیے ریاستِ پاکستان، اس کی مسلح افواج، سرکاری اداروں اور قومی اداروں کے ساتھ مضبوطی سے کھڑا ہے۔واضح رہے کہ ایف پی سی سی آئی کی سینٹرل اسٹینڈنگ کمیٹی برائے گورنمنٹ ایجنسیز کے ساتھ رابطہ کاری اور اس کی کنوینر محترمہ مریم صبا چوہدری کے زیرِ اہتمام، آرٹس کونسل آف پاکستان کراچی (ACPKHI) سے کراچی پریس کلب (KPC) تک ایک شاندار اور پروقار امن واک کا انعقاد کیا گیا۔اس امن واک میں کراچی کی ممتاز کاروباری اور سماجی شخصیات نے شرکت کی، جن میں ایف پی سی سی آئی کے سینئر نائب صدر (SVP) ثاقب فیاض مگوں؛ سابق SVP خالد تواب؛ سابق SVP حنیف گوہر؛ سابق نائب صدور شکیل ڈھینگرا، محترمہ سعیدہ بانو، شبیر منشاء، اکرام راجپوت؛ کلاتھ مرچنٹس ایسوسی ایشن کے احمد چنائے؛ ڈاکٹر فرحان عیسیٰ، ٹینرز ایسوسی ایشن کے چیئرمین دانش امان اور آرٹس کونسل کے صدر و سابق وزیر احمد شاہ شامل تھے۔اس موقع پر گفتگو کرتے ہوئے تاجر برادری کے رہنماؤں نے کہا کہ پاکستان آج ایک فیصلہ کن موڑ پر کھڑا ہے۔ اب قومی سلامتی کو سنجیدہ اصلاحات، پالیسیوں کے تسلسل، کاروبار میں آسانی، سرمایہ کاروں کے تحفظ اور براہ راست غیر ملکی سرمایہ کاری (FDI) کے لیے سازگار ماحول کے ذریعے معاشی طاقت کے ساتھ ہم آہنگ کرنا ہوگا۔انہوں نے اس بات پر زور دیا کہ انصاف اور قانون کی حکمرانی بھی اتنی ہی ضروری ہے۔ کاروبار اور غیر ملکی سرمایہ کاروں کو اس بات کا اعتماد ہونا چاہیے کہ ان کے معاہدوں، جائیداد کے حقوق اور تنازعات کا ایک قابلِ اعتبار، بروقت اور متوقع قانونی نظام کے ذریعے تحفظ کیا جائے گا۔رہنماؤں نے مزید کہا کہ اگر پاکستان نے اپنی حکمتِ عملی درست رکھی، تو وہ خطے کی ایک مضبوط معاشی طاقت بن کر ابھر سکتا ہے۔ تاہم، اگر یہ موقع گنوا دیا گیا تو اس کے نتائج آنے والے کئی سالوں تک بھگتنا پڑیں گے۔ایک مضبوط، خود کفیل اور خوشحال پاکستان کے لیے اب امن، استحکام، انصاف اور معاشی اصلاحات کو ایک ساتھ آگے بڑھنا ہوگا۔ اس واک کا اختتام ان قومی مقاصد کے حصول کے لیے تمام اسٹیک ہولڈرز کے تجدیدِ عہد اور مثبت یقین دہانیوں کے ساتھ ہوا۔