ميرپورخاص ڀرسان بس ۽ ٽرڪ ۾ ٽڪر، ڊرائيور فوت، 15 کان وڌيڪ زخمي

ڪراچي کان عمرڪوٽ ايندڙ مسافر بس ۽ سامهون ايندڙ ٽرڪ ۾ زوردار ٽڪر ٿي پيو

عمرڪوٽ (ڊ ر) ڪراچي کان عمرڪوٽ ايندڙ ڪاڪا پنهور موورز جي مسافر بس ميرپورخاص ڀرسان خوفناڪ روڊ حادثي جو شڪار ٿي وئي، جتي بس سامهون ايندڙ ٽرڪ سان ٽڪرائجي وئي، حادثي جي نتيجي ۾ بس جو ڊرائيور محبوب آريسر سخت زخمي ٿي پيو، جڏهن ته 15 کان وڌيڪَ مسافر پڻ زخمي ٿي پيا، ذريعن موجب حادثي کان پوءِ ريسڪيو ٽيمن ۽ مقامي ماڻهن فوري طور امدادي ڪارروائيون شروع ڪري زخمين کي ويجهن اسپتالن ڏانهن منتقل ڪيو، ڊرائيور محبوب آريسر کي ڳڻتي جوڳي حالت ۾ اسپتال منتقل ڪيو ويو، پر هو زخمن جا سور نه سهندي فوت ٿي ويو، واقعي کان پوءِ علائقي ۾ ڏک ۽ سوڳ جي لهر ڇانئجي وئي، جڏهن ته زخمين مان ڪجهه جي حالت پڻ تشويشناڪ ٻڌائي پئي وڃي، پوليس حادثي واري هنڌ پهچي ٽريفڪ بحال ڪرائي ۽ واقعي بابت وڌيڪَ جاچ شروع ڪري ڇڏي آهي، هوڏانهن فوتي ڊرائيور محبوب آريسر جي لاڏاڻي جي خبر سندس وارثن ۽ ساٿين ۾ ڏک جي لهر ڇڏي وئي آهي، جڏهن ته مختلف سماجي ۽ ٽرانسپورٽ حلقن پاران سندس وفات تي گهري ڏک جو اظهار ڪيو ويو آهي